अनलाइनबाट १३ लाख बढी ठगिएपछि २३ वर्षीय युवकले गरे आत्महत्या
असोज ३०, २०८१ १२:६
काठमाडौं । अनलाइन ठगीको शिकार भएपछि एक युवकले आत्महत्या गरेका छन् । बुधबार कञ्चनपुर जिल्लाकाे भिमदत्त नगरपालिका वडा नम्बर ४ का २३ वर्षीय योगेश ठगुन्नाले आत्महत्या गरेका हुन् ।
जिल्ला प्रहरी कार्यालय कन्चनपुरका प्रवक्ता एवम् प्रहरी निरीक्षक उमेश जोशीका अनुसार आफ्नै कोठामा झुण्डिएको अवस्थामा फेला परेपछि याेगेशकाे परिवारले प्रहरीलाई खबर गरेको थियो । त्यसलगत्तै घटनास्थल पुगेको प्रहरीले ठगुन्नाको साथबाट सुसाइड नोट फेला पारेको छ । त्यसमा उनले आफू अनलाइन ठगीको शिकार भएपछि आत्महत्याको बाटो रोजेको उल्लेख गरेका छन् ।
मृतक योगेशका ठूलाबुवा कृष्णसिंह ठगुन्नाले टेकपानासँग भने, “अनलाइनमा पैसा दोब्बर आम्दानी हुने भन्दै लगानी गर्न लगाइएको रहेछ । त्यसैमा लगानी गर्दा गर्दै १३ लाख भन्दा बढी डुबेछ । तनाव झेल्न नसकेर आत्महत्या गरेको देखिन्छ ।”
शव पोस्टमार्टमका लागि महाकाली अञ्चल अस्पताल पुर्याइएको प्रहरीले जनाएको छ ।
पछिल्लो अध्यावधिक: असोज ३०, २०८१ १२:७
