क्यामेरा पारखीका लागि ६८ हजार मूल्यमै गज्जबको भिभो फोन (भिडिओ रिभ्यु सहित)

काठमाडौँ । आज मसँग क्यामेरा केन्द्रित फोन छ, जसको नाम हो- भी५० फाइभजी । फोनको सबै क्यामेरा लेन्स 'ZEISS' सँगको साझेदारीमा विकास गरिएको छ । ZEISS उच्च गुणस्तरको क्यामेरा लेन्स उत्पादनका लागि परिचित छ । जुन प्रायः व्यावसायिक क्यामेराहरूमा प्रयोग हुन्छ ।

नेपाली बजारमा यो फोनको मूल्य ६८ हजार रुपैयाँ तोकिएको छ । साथमा कम्पनीले ५० दिनको हार्डवेयर रिप्लेसमेन्ट ग्यारेन्टी पनि दिएको छ । आज म यस सामग्रीमा यो फोनको क्यामेरासँगै अन्य सुविधाहरूको चर्चा गर्दैछु:

सर्वप्रथम, फोनमा अण्डाकार-गोलाकार आकारको क्यामेरा मोड्युल पाउन सकिन्छ । यसमा मिनिमालिस्टिक क्यामेरा बम्प छ, जहाँ डुअल क्यामेरा सेटअप आउरा लाइटसहित उपलब्ध छ ।

मैले सुरुमै उल्लेख गरिसकेको छु कि, फोनका सबै पछाडि र अगाडिका क्यामेरा लेन्सहरू ZEISS सँग मिलेर बनाइएका हुन् । यसमा ओआईएसयुक्त ५० मेगापिक्सेलको मुख्य क्यामेरा, ५० मेगापिक्सेलकै अल्ट्रा वाइड क्यामेरा र ५० मेगापिक्सेलकै फ्रन्ट क्यामेरा छ ।

मैले सबै क्यामेरा मोडहरूबाट फोटो र भिडिओ खिचेँ । क्यामेरालाई केन्द्रित गरेर ल्याइएको भएता पनि एकदमै फरक खालको क्यामेरा मोड भने छैनन् । सामान्य क्यामेरा मोडहरू नै पाउन सक्नुहुन्छ । जस्तै; नाइट, पोर्ट्रेट, फोटो, भिडिओ । भिभोले प्रायः दिँदै आएको माइक्रो मुभी यसमा छ अन्डर वाटर फोटोग्राफी, सुपरमुन, एस्ट्रो लगायत मोडहरू पनि छन् ।

तर मुख्य क्यामेरा मोडहरूले पक्कै राम्रो पर्फर्मेन्स गर्ने छन्, यसमा कुनै शङ्का छैन । फोनबाट लिइएको सामान्य फोटोको कुरा गर्दा पनि यो उत्कृष्ट देखिन्छ । जुम गर्दा, क्रप गर्दा पनि क्वालिटी उस्तै रहन्छ ।

फोनबाट लाइभ फोटो पनि खिच्न सक्नुहुन्छ । त्यस्तै, फोनबाट लिइएको पोर्ट्रेट पनि कुनै फ्ल्यागशिप फोनबाट लिइएको भन्दा कम देखिँदैन र सबैभन्दा राम्रो कुरा भनेको तपाईंले फरक फोकल लेन्थमा पोर्ट्रेट फोटो खिच्न सक्नुहुन्छ, जुन २३ एमएम, ३५ एमएम र ५० एमएम हो ।

५० एमएम र ३५ एमएममा बोकेह इफेक्ट एकदमै राम्रोसँग काम गर्छ । तपाईंले पोर्ट्रेट मोडमा विभिन्न बोकेह फ्लेयरहरू जस्तै; सिनेमाटिक, सिने-फ्लेयर, बायोटार लगायत छनौट गरेर पनि तस्बिरहरू लिन सक्नुहुन्छ । यसले तपाईंको फोटोमा कलात्मक प्रभाव थप्छ ।

पर्याप्त प्रकाश भएको अवस्थामा फोटोको गुणस्तर राम्रो छँदैछ, यसबाहेक भित्र पनि यसले सक्दो राम्रो प्रदान गर्छ । राति खिच्दा पनि डिटेल्ड इमेज पाउन सकिन्छ ।

वाइड एंगल फोटोहरूमा पनि गुणस्तर घटेको खासै महसुस हुँदैन । सेल्फी पनि उत्कृष्ट छ । सेल्फी क्यामेरामा टेलिप्रम्प्टर पनि छ । त्यसैले यदि तपाईं केही रेकर्ड गर्न चाहनुहुन्छ भने फोनको बिल्ट-इन प्रम्प्टरमा टेक्स्ट थपेर रेकर्ड गर्न सक्नुहुन्छ, जुन सामग्री निर्माताहरूका लागि धेरै उपयोगी उपकरण हो ।

भिडिओ रेकर्डिङको कुरा गर्दा, फोरके भिडिओ ३० एफपीएससम्म रेकर्ड गर्न सक्नुहुन्छ । र, पछाडिको क्यामेराबाट पनि ३० एफपीएसमा फोरके भिडिओ खिच्न सक्नुहुन्छ । १०८०पी भिडिओ भने ६० एफपीएससम्म रेकर्ड गर्न सकिन्छ ।

६८ हजार रुपैयाँ तिरेपछि ६० एफपीएसमा फोरके भिडिओ हुनुपर्ने अपेक्षा राख्न सकिन्छ । भिडिओ गुणस्तरलाई स्तरीय मान्न सकिन्छ, ओआईएसले राम्रोसँग काम गर्छ ।

मैले फ्रन्ट क्यामेराबाट बोल्दै खिचेको भिडिओ गुणस्तर पनि ठीकठाक छ, स्थिर छ । अर्को रोचक सुविधा भनेको यसबाट पोर्ट्रेट भिडिओ पनि लिन सक्नुहुन्छ, जुन आईफोनहरूमा हुने सिनेमाटिक भिडिओहरू जस्तै हो भन्दा फरक नपर्ला । 

क्यामेराको कुरा गर्दा यसमा अझै धेरै छन् । जस्तै तपाईंले फिल्म क्यामेरा मोड प्रयोग गर्न सक्नुहुन्छ, जसबाट फिल्मी भाइब्सको अनुभव लिन सकिन्छ । बाँकी धेरै प्रभावहरू, फिल्टरहरू, ब्यूटी मोडहरू त छन्दैछन् । त्यसैले, समग्रमा यो फोनको क्यामेरालाई पूर्ण रूपमा प्याक गरिएको क्यामेरा फोन भन्दा फरक नपर्ला ।

क्यामेराको बारेमा धेरै कुरा भयो, अब फोनतिर फर्कौं । फोन हातमा पर्ने बित्तिकै तपाईंलाई पहिलो नजरमा मन पर्ने यसको रूप हो, जुन पूर्ण रूपमा प्रिमियम फोनको अनुभूति दिन्छ ।

हातमा समात्दा सहज छ, बोक्न सहज र हल्का छ । यसको सहज बनावटका कारण, म तपाईंलाई फोन कभर प्रयोग गर्न सुझाव दिन्छु, जसले तपाईंलाई ग्रिप दिन्छ । डिस्प्लेको कुरा गर्दा फोनमा ६.७७ इन्चको फोरडी कर्भ्ड स्क्रिन पाउनुहुने, १२० हर्ज रिफ्रेस रेट सहित । स्क्रिनको ब्राइटनेस ४५०० निट्स पाउन सक्नुहुन्छ, जुन उज्यालो प्रकाशमा पनि पर्याप्त भन्दा बढी हो । घुमाउरो स्क्रिनले गर्दा तपाईंलाई फोनमा हेर्ने अनुभव राम्रो महसुस हुन्छ ।

पर्फर्मेन्सतर्फ हेर्दा, यो फोन एन्ड्रोइड १५ मा आधारित छ र भिभोको आफ्नै फन्टच ओएस १५ बाट सञ्चालित छ । प्रोसेसर भने योभन्दा अगाडि लन्च भएको फोन भी४० कै छ, जुन क्वालकम स्न्यापड्रागन ७ जेन थ्री फोर एमएम प्रोसेसर हो ।

अब मलाई लाग्छ, भिभोले प्रोसेसर अपग्रेड गर्ने समय भइसकेको छ । तर यो गेमिङ फोन नभएकोले प्रोसेसरले सामान्य कार्यहरू, सामान्य गेमिङहरू र पब्जीजस्ता हेभी गेमहरू पनि सजिलै चलाउन सक्छ ।

फोनमा भीसी स्मार्ट कुलिङ सिस्टम पनि भएकोले तापक्रम व्यवस्थापन हुन्छ । र तपाईंले गेम खेल्दा आफ्नो आवाज परिवर्तन पनि गर्न सक्नुहुन्छ, जुन अनुभव गर्न रमाइलो कुरा हो । त्यसैले, समग्रमा यो फोनको लागि यो प्रोसेसर राम्रो छ भन्दा फरक पर्दैन ।

अब फोनका केही रोचक सुविधाहरू हेरौं । रोचक किनभने फोनमा एआई इन्टिग्रेसनहरू छन्, जस्तै- एआई इमेज स्टुडियो अन्तर्गत एआई इरेजर छ, यसको प्रयोगले फोटोबाट अनावश्यक वस्तुहरू सजिलै मेटाउन सकिन्छ ।

त्यस्तै, लाइभ कटआउटको सुविधा पनि छ, जुन तपाईंले चाहेअनुसार प्रयोग गर्न सक्नुहुन्छ । स्टिकरको रूपमा पनि प्रयोग गर्न सक्नुहुन्छ । आईफोन प्रयोगकर्तालाई यो सुविधा नौलो नहोला । बाँकी एआई सुविधाहरूको कुरा गर्दा फोनमा गुगल जेमिनाई एआई पाउनुहुन्छ । त्यस्तै स्क्रिन ट्रान्सलेटको सुविधा पनि पाउनुहुन्छ, जसले १३२ भाषासम्म सपोर्ट गर्दछ । त्यस्तै, सर्कल टु सर्च, एआई ट्रान्सक्रिप्ट, लाइभ टेक्स्ट जस्ता लोकप्रिय एआई सुविधाहरू पनि फोनमा छन् ।

कस्टमाइजेसन अप्सटहरूको कुरा गर्दा धेरै एपहरू र छिटो र सजिलो पहुँचको लागि एज प्यानल छ । यसमा तपाईंले अत्यधिक प्रयोग गर्ने एपहरू थप्न सक्नुहुन्छ । स्प्लिट स्क्रिन, मल्टि विन्डो लगायत मल्टी टास्किङ सुविधा पनि फोनमा छन् ।

फोनमा धेरै विजेटहरू पनि उपलब्ध छन् । फेस आईडी, चार्जिङ, फिंगरप्रिन्टहरूका लागि एम्बियन्ट लाइट इफेक्टहरू, एनिमेसन विकल्पहरू पनि छन् । वालपेपर, थिमहरूमा पनि कस्टमाइजेसनका विकल्पहरू पक्कै भेट्नुहुन्छ ।

अब कुरा गरौं फोनको अर्को प्रमुख आकर्षणको, अनुमान लगाउनुहोस् । हो, यो ब्याट्री हो । भिभो भी५० मा तपाईंले ६००० एमएएच क्षमताको ब्लुभोल्ट ब्याट्री पाउनुहुन्छ ।

ब्लुभोल्ट ब्याट्रीको विशेषता भनेको यसले सानो आकारमा पनि धेरै पावर प्रदान गर्न सक्छ, त्यसैले ६००० एमएएचको ब्याट्री भए पनि फोन पातलो छ । त्यसैगरी, ब्याट्रीमा विस्तारित ब्याट्री लाइफ र शक्तिशाली ब्याट्री स्वास्थ्य पनि पाउन सक्नुहुन्छ ।

ब्याट्री चार्ज गर्न ९० वाटको फ्ल्याश चार्जर उपलब्ध छ, जसले एक घण्टाभित्र फोन पूर्ण रूपमा चार्ज गरिदिन्छ । र फोनमा ७ देखि ८ घण्टाको स्क्रिन टाइम मजाले पाउनुहुन्छ । तपाईं यात्रामा हुनुहुन्छ भने १० मिनेट मात्र फोन चार्ज गरेर पनि आफ्नो धेरै कामहरू सक्नुहुन्छ ।

स्टोरेजतर्फ तपाईंले १२ जीबी र्‍याम पाउनुहुन्छ, जसलाई थप १२ जीबी भर्चुअल रूपमा विस्तार गर्न सक्नुहुन्छ ।

कनेक्टिभिटीको लागि डुअल ब्यान्ड वाई-फाई, डुअल सिम, ब्लुटुथ लगायत पाउनुहुन्छ । र यदि तपाईं संगीत प्रेमी हुनुहुन्छ भने तपाईंको अनुभवलाई अझ राम्रो बनाउन फोनमा डुअल स्टेरियो स्पिकर पनि छ । सेक्युरिटीको लागि पिन, पासवर्ड, इन डिस्प्ले फिंगरप्रिन्ट आदि पाउन सक्नुहुन्छ । थप रोचक कुरा भनेको यो फोनले पानी र धुलो प्रतिरोधका लागि आईपी ६८ र आईपी ६९ रेटिङ पनि पाएको छ, जुन प्रशंसायोग्य छ ।

तपाईंलाई थाहा भइसक्यो कि यसको मूल्य ६८ हजार रुपैयाँ हो । मलाई भने फोनको समग्र कुरा हेर्दा ६० हजार रुपैयाँसम्मको मूल्य यो फोनको लागि उपयुक्त हुन्थ्यो कि जस्तो लाग्यो । बाँकी यदि तपाईं उत्कृष्ट क्यामेरा क्वालिटी, राम्रो लुक्स, राम्रो पर्फर्मेन्स भएको फोन खोज्दै हुनुहुन्छ भने भिभो भी५० फाइभजी स्मार्ट उपयुक्त हुन सक्छ ।

भिडिओ रिभ्यु

*समाचारमा फोनको मूल्य ६८ हजार रुपैयाँ हुनुपर्नेमा अन्यथा भएकाले सच्याइएको छ । स.

पछिल्लो अध्यावधिक: चैत ३१, २०८१ १८:३४

टिप्पणीहरू