बच्चाहरूको फोन नियन्त्रण गर्ने एन्ड्रोइडको प्यारेन्टल कन्ट्रोल प्रयोग गर्न अब झनै सजिलो

काठमाडौँ । एन्ड्रोइडले प्यारेन्टल कन्ट्रोल (बालबालिकाका फोनमा अभिभावकीय नियन्त्रण) व्यवस्थापन गर्ने प्रक्रियालाई अझ सरल बनाएको छ । नयाँ सुविधा अनुसार अब अभिभावकहरूले एन्ड्रोइड सेटिङभित्रै नयाँ 'Parental Controls' को विकल्प पाउने गुगलले जनाएको छ ।

जहाँ बिल्ट-इन कन्ट्रोल र गुगल फेमिली लिङ्क (Google Family Link) दुवैलाई प्रयोग गर्न सकिन्छ । यो अपडेट बुधबारदेखि बेटा भर्सनमा उपलब्ध गराइएको छ ।

यी नयाँ अन-डिभाइस नियन्त्रणहरू सजिलै सेट गर्न सकिने पिनबाट सुरक्षित गरिनेछ । यसले अभिभावकहरूलाई आफ्ना बच्चाहरूको स्मार्टफोन प्रयोगलाई अझ राम्रोसँग व्यवस्थापन गर्न मद्दत गर्नेछ ।

नयाँ बिल्ट-इन नियन्त्रणहरूको मुख्य विशेषता

• अभिभावकहरूले बच्चाहरूको स्मार्टफोन प्रयोगमा स्क्रिन टाइमको सीमा तोक्न सक्नेछन् ।

• बालबालिकालाई सुत्ने, परीक्षा जस्ता विशेष समयमा डिभाइसमा पहुँच प्रतिबन्ध लगाउन डाउनटाइम तालिका सेट गर्न सकिनेछ ।

• विशेष एपहरूका लागि समय सीमा तोक्ने वा निश्चित एपहरूलाई पूर्ण रूपमा ब्लक गर्ने सुविधा पनि यसमा उपलब्ध हुनेछ ।

• गुगल क्रोम र गुगल सर्च जस्ता ब्राउजर र सर्च इन्जिनहरूबाट एडल्ट कन्टेन्ट फिल्टर गर्न सकिनेछ ।

यी बिल्ट-इन कन्ट्रोलका अतिरिक्त परिवारका सदस्यहरूबिच गुगल फेमिली लिङ्क प्रयोग गरेर अझ शक्तिशाली सुविधाहरूको लाभ लिन सकिनेछ । फेमिली लिङ्कमार्फत स्कुल टाइम, एप खरिदको स्वीकृति, लोकेसन अलर्ट जस्ता सुविधाहरू अभिभावकको फोनबाट सिधै व्यवस्थापन गर्न सकिन्छ ।

यसले धेरै बच्चा र टुलहरू व्यवस्थापन गर्न सजिलो र सहज बनाउँछ । प्रयोगकर्ताहरूले बिल्ट-इन कन्ट्रोलहरूबाट गुगल फेमिली लिङ्कमा सजिलै स्विच गर्न सक्नेछन् । यो नयाँ सुविधा एन्ड्रोइड, क्रोम, क्रोमबुक, गुगल प्ले र वेयर ओएस जस्ता गुगलका उत्पादनहरूसँग सम्बन्धित छ ।

पछिल्लो अध्यावधिक: भदौ ६, २०८२ ११:१०

टिप्पणीहरू