च्याट ब्याकअपका लागि ह्वाट्सएपमा थपियो पासकी फिचर, अब ६४ अङ्कको इन्क्रिप्सन कि सम्झनु नपर्ने
कात्तिक १५, २०८२ ११:१३
काठमाडौँ । मेटाको स्वामित्वमा रहेको लोकप्रिय मेसेजिङ सर्भिस ह्वाट्सएपले च्याट ब्याकअप सुरक्षित गर्नका लागि पासकी सपोर्ट सुरु गरेको छ । यो नयाँ सुविधाले प्रयोगकर्ताहरूलाई आफ्नो इन्क्रिप्टेड ब्याकअपमा पहुँच गर्न थप सहज हुनेछ ।
ह्वाट्सएपका अनुसार पासकी सहितको इन्क्रिप्सनले प्रयोगकर्ताहरूलाई फिङ्गरप्रिन्ट, फेस वा डिभाइसको स्क्रिन लक कोड प्रयोग गरेर ब्याकअप इन्क्रिप्ट गर्न सहज बनाउनेछ ।
पासकीको आवश्यकता किन ?
ह्वाट्सएपले चार वर्षअघि नै आफ्ना च्याट ब्याकअपका लागि इन्ड-टु-इन्ड इन्क्रिप्सन प्रदान गर्ने पहिलो निजी मेसेजिङ एप भएको दाबी गरेको थियो । यो सेवा सन् २०२१ मा सुरु गरिएको थियो ।
तर इन्क्रिप्टेड ब्याकअप रिस्टोर गर्नका लागि प्रयोगकर्ताहरूले कि त पासवर्ड प्रयोग गर्नु पर्थ्यो अथवा ६४-अङ्कको इन्क्रिप्सन कि सुरक्षित गरेर राख्नु पर्थ्यो । यसलाई सम्झनु पर्ने वा सधैँ हातमा राख्नुपर्ने झन्झटले गर्दा यो प्रणाली जटिल थियो ।
पासकीले पासवर्डलाई डिभाइसमा निर्मित बायोमेट्रिक अथेन्टिकेसन सिस्टम (authentication systems) द्वारा प्रतिस्थापन गर्छन् । नयाँ सुविधा लागु भएपछि प्रयोगकर्ताहरूले अब पासवर्ड वा ६४-अङ्कको इन्क्रिप्सन कि सम्झनु पर्दैन ।
यो सुविधाले प्रयोगकर्ताहरूलाई केवल एक ट्याप वा हेराईको साथ आफ्नो च्याट ब्याकअप सुरक्षित, पहुँचयोग्य र गोप्य राख्न मद्दत गर्छ । धेरै मानिसहरूले आफ्ना बहुमूल्य सम्झनाहरू जस्तै फोटो, भ्वाइस नोट र महत्त्वपूर्ण कुराकानी ह्वाट्सएप च्याटमा राख्छन् । त्यसैले फोन हराउँदा वा नयाँ डिभाइसमा ट्रान्सफर गर्दा तिनलाई सुरक्षित राख्न जरुरी छ ।
कसरी प्रयोग गर्ने ?
यो अपडेट आईओएस र एन्ड्रोइड प्रयोगकर्ताहरूका लागि रोलआउट भइरहेको छ । ह्वाट्सएपले जनाए अनुसार यो सुविधा क्रमिक रूपमा आगामी हप्ता र महिनाहरूमा उपलब्ध हुनेछ ।
यो सुविधा प्रयोग गर्नका लागि प्रयोगकर्ताहरूले सुरुमा ह्वाट्सएप सेटिङमा जानु पर्छ । त्यसपछि च्याट्स (Chats) चयन गरेर च्याट ब्याकअप (Chat backup) मा ट्याप गर्नुहोस् ।
इन्ड-टु-इन्क्रिप्टेड ब्याकअप (End-to-end encrypted backup) मा ट्याप गर्नुहोस् र त्यहाँ उपलब्ध विकल्पहरू चेक गर्नुहोस् ।
ह्वाट्सएपले सन् २०२३ मा अकाउन्ट लगइनका लागि पासकी सपोर्ट रोलआउट गरिसकेको थियो । ब्याकअपमा पनि पासकीको विस्तारले प्लेटफर्मले पासवर्डलाई पूर्ण रूपमा हटाउने भविष्यलाई अँगालिरहेको सङ्केत गर्दछ ।
पछिल्लो अध्यावधिक: कात्तिक १५, २०८२ ११:१३
