यी प्लेटफर्मको नाम लिएर ‘अनलाइन जब’ को प्रस्ताव आयो ? होसियार, तपाईं ठगिँदै हुनुहुन्छ !

काठमाडौँ । पछिल्लो समय ‘घरमै बसेर अनलाइनमार्फत लाखौं कमाउन सकिने’ प्रलोभन देखाएर ठगी गर्ने धन्दा फस्टाएको छ । ठगहरूले चर्चित विदेशी कम्पनीको नाम लिएर अनलाइन कामको बहानामा सर्वसाधारणलाई फसाउने गरेका छन् ।

सुरुवातमा ‘लगानी नै नगरी कमाउन सकिने’ भन्दै उनीहरूले विश्वास जित्न केही रकम दिन्छन् । तर, विस्तारै पीडित प्रलोभनमा पर्न थालेपछि लगानी गर्न लगाइन्छ । यसरी सुरुमा थोरै रकमबाट लगानी गराएर अन्त्यमा करोडौंसम्म जम्मा गर्न लगाई ठगी गर्ने गरेको पाइएको छ ।

यस्ता घटना व्यापक रूपमा बढेसँगै नेपाल प्रहरीले ती प्लेटफर्मको नाम जोड्दै आउने जागिरका प्रस्ताव ठगीको पासो हुन सक्ने भन्दै सचेत गराएको छ ।

प्रहरीले जारी गरेको सूचनामा भनिएको छ, “सामाजिक सञ्जाल फेसबुकका 'स्पोन्सर्ड एड्स' मार्फत विभिन्न ई-कमर्स प्लेटफर्महरूको नाम प्रयोग गरी अनलाइन जबका नाममा बारम्बार रकम लगानी गर्न लगाउने र घरमै बसीबसी कमाउन सकिने झुटो आश्वासन दिई ठगी गर्ने प्रवृत्ति बढेको छ । तसर्थ, प्रयोगकर्ताहरूलाई यस्ता प्रलोभनमा नपर्न अनुरोध गरिन्छ ।”

नेपालमा यी प्लेटफर्मको नाम लिएर ठगी गर्ने गतिविधि भइरहेकाले यस्ता प्रस्ताव आउँदा विशेष सतर्कता अपनाउन प्रहरीले आग्रह गरेको छ ।

• SMC

• Monica Vinader

• Temu

• Ikea

• Modani

• Zamzam

• Etsy

• Jumia

• Travelocity

• Tucan Travel

• Online Jon

• ORM

• Ixigo

• Room and Board

• Butterfield & Robinson

पछिल्लो अध्यावधिक: मंसिर ६, २०८२ १८:२४

टिप्पणीहरू