एआईले निम्त्याउनसक्ने जोखिम हेर्ने कर्मचारी खोज्दै च्याटजीपीटी निर्माता ओपनएआई, तलब ८ करोड
पुस १३, २०८२ १९:५५
काठमाडौँ । एआई प्रविधिको क्षेत्रको प्रमुख मध्येको कम्पनी ओपनएआईले आफ्ना मोडेलहरूबाट हुन सक्ने सम्भावित गम्भीर क्षति र जोखिमहरूलाई पूर्वानुमान तथा न्यूनीकरण गर्नका लागि ‘हेड अफ प्रिपयर्डनेस’ पदमा कर्मचारी नियुक्त गर्ने घोषणा गरेको । कम्पनीका प्रमुख कार्यकारी अधिकृत (सीईओ) साम अल्टम्यानले सामाजिक सञ्जाल एक्स मार्फत उक्त पदका लागि आह्वान गर्दै एआई मोडेलहरू सुधारिँदै जाँदा तिनले केही वास्तविक चुनौतीहरू खडा गर्न थालेको स्वीकार गरेका छन् ।
यस पदमा नियुक्त हुने व्यक्तिले साइबर सुरक्षा, मानसिक स्वास्थ्य र नियन्त्रण बाहिर जान सक्ने एआई जस्ता गम्भीर विषयहरूमा काम गर्नुपर्नेछ । यो भूमिकामा रहने व्यक्तिको मुख्य काम भविष्यका शक्तिशाली एआई मोडेलहरूमा हुन सक्ने जैविक क्षमताको दुरुपयोग रोक्न सुरक्षा मापदण्डहरू निर्माण गर्नु र कम्पनीको सुरक्षा पाइपलाइनलाई व्यवस्थित बनाउनु हुनेछ ।
यो नियुक्तिको घोषणा यस्तो समयमा भएको छ, जब एआई च्याटबटहरूका कारण मानिसहरूको मानसिक स्वास्थ्यमा परेको नकारात्मक प्रभावलाई लिएर विभिन्न प्रश्नहरू उठिरहेका छन् । मानिसहरूमा भ्रम पैदा गर्ने, षड्यन्त्रका सिद्धान्तहरूलाई प्रोत्साहन दिने र किशोरकिशोरीहरूमा आत्महत्या जस्ता घटनामा एआई च्याटबट जोडिएका उजुरीहरू परेपछि यो सुरक्षा रणनीति अपनाइएको हो ।
साम अल्टम्यानले मानसिक स्वास्थ्यमा देखिएका प्रभावहरू एउटा 'प्रिभ्यु' मात्र भएको र यसलाई गम्भीरतापूर्वक लिनुपर्ने कुरा यस अघि नै बनाइसकेका छन् ।यो पदका लागि वार्षिक ५ लाख ५५ हजार अमेरिकी डलर (करिब ८ करोड रुपैयाँ) र अतिरिक्त इक्विटी तोकिएको छ ।
यद्यपि, अल्टम्यानले यो कामलाई अत्यन्तै तनावपूर्ण हुने चेतावनी पनि दिएका छन् । जहाँ नियुक्त हुने व्यक्तिले तुरुन्तै गम्भीर चुनौतीहरूको सामना गर्नुपर्नेछ।
We are hiring a Head of Preparedness. This is a critical role at an important time; models are improving quickly and are now capable of many great things, but they are also starting to present some real challenges. The potential impact of models on mental health was something we…
— Sam Altman (@sama) December 27, 2025
पछिल्लो अध्यावधिक: पुस १३, २०८२ १९:५५
