युट्युबमा अब शर्ट्स भिडिओ बन्द गर्न सकिने, यसरी प्रयोग गर्नुहोस् 'जिरो मिनेट' लिमिट नामक नयाँ फिचर

काठमाडौँ । युट्युबले आफ्ना प्रयोगकर्ताहरूलाई शर्ट्स भिडिओको लतबाट छुटकारा दिन नयाँ फिचर ल्याएको छ । यसअन्तर्गत प्रयोगकर्ताले अब आफ्नो मोबाइल एपमा शर्ट्स हेर्ने समयसीमा शून्य मिनेट (Zero Minutes) सेट गर्न सक्नेछन् ।

यो फिचरले एन्ड्रोइड र आईओएस प्रयोगकर्ताहरूलाई आफ्नो एपबाट शर्ट्स फिडलाई प्रभावकारी रूपमा हटाउन वा बेवास्ता गर्न मद्दत गर्छ । यो सेटिङ अन गर्न प्रयोगकर्ताले युट्युब एपको सेटिङ्स (Settings) मा गएर 'टाइम म्यानेजमेन्ट' (Time management) भित्र रहेको 'शर्ट्स फिड लिमिट' (Shorts feed limit) मा गई शून्य मिनेट (Zero minutes) छनोट गर्नुपर्ने हुन्छ ।

यसो गर्दा युट्युबको होमपेजबाट शर्ट्स भिडिओहरू पूर्ण रूपमा हट्नेछन् । यद्यपि प्रयोगकर्ताले चाहेमा सब्स्क्रिप्सन फिडमा गएर वा प्रत्येक शर्ट्स भिडिओ भने हेर्न सक्नेछन् । शून्य मिनेट सेट गरिसकेपछि शर्ट्स स्क्रोल गर्न खोज्दा 'तपाईंले आफ्नो शर्ट्स फिड लिमिट पूरा गर्नुभयो' (reached your Shorts feed limit) भन्ने फुल-स्क्रिन सूचना देखिनेछ र स्क्रोलिङ रोकिनेछ ।

यो लिमिटको कार्यप्रणाली अकाउन्टको प्रकृतिअनुसार फरक छ । गुगल फ्यामिली लिंक मार्फत अभिभावकले निगरानी गरेका टिनएज (teen) अकाउन्टहरूमा शून्य मिनेटको लिमिट सेट गरेपछि यसले कडा पर्खालको रूपमा काम गर्छ र बच्चाहरूले यसलाई हटाएर थप भिडिओ हेर्न पाउँदैनन् । तर वयस्कहरूको अकाउन्टमा भने यो लिमिट एउटा सामान्य रिमाइन्डरको रूपमा मात्र आउँछ । जसलाई सजिलै हटाएर भिडिओ स्क्रोलिङलाई निरन्तरता दिन सकिन्छ । यो फिचर हाल मोबाइल एपका लागि मात्र ल्याइएको छ । डेस्कटपमा शर्ट्स ब्लक गर्न प्रयोगकर्ताहरूले अझै पनि ब्राउजर एक्सटेन्सनकै भर पर्नुपर्ने हुन्छ ।

युट्युबकी प्रवक्ता म्याकेन्जी स्पिलरका अनुसार अब शून्य मिनेट सेट गर्ने विकल्प सबै अभिभावकहरूको लागि उपलब्ध (Live) भइसकेको छ र सामान्य वयस्क अकाउन्ट भएका सबै प्रयोगकर्ताहरूका लागि पनि रोलआउट गरिँदैछ।

सन् २०२० मा लन्च भएदेखि युट्युबले शर्ट्स प्रवर्धन गर्न ठुलो लगानी गरेको छ । हालै यसको अधिकतम लम्बाइ तीन मिनेटसम्म पुर्‍याइएको छ भने एआई जेनेरेटेड अवतार जस्ता क्रिएटर टुलहरू पनि थपिएका छन् । यसको इन्फाइनाइट स्क्रोलिङ (अनन्त स्क्रोल) डिजाइनले प्रयोगकर्तालाई लामो समयसम्म अड्याइराख्छ । स्क्रिन टाइम घटाउने दबाब बढिरहेको बेला युट्युबले यो सेटिङलाई भित्र लुकाएर राखेको छ । यसरी भित्र 'जिरो मिनेट' को विकल्प राख्दा प्रयोगकर्तालाई शर्ट्स छोड्न आधिकारिक रूपमा प्रोत्साहित नगरीकनै आफ्नो 'डिजिटल वेलबिइङ'को दायित्व पूरा गरेको देखाउने बाटो कम्पनीलाई मिलेको छ । यद्यपि यो फिचर ल्याउनुलाई युट्युबले मौन रूपमै भए पनि शर्ट्सले लत लगाउने समस्या निम्त्याएको स्वीकार गरेको रूपमा विश्लेषण गरिएको छ ।

पछिल्लो अध्यावधिक: बैशाख ३, २०८३ ९:२१

टिप्पणीहरू