एन्ड्रोइडको डेटा सेभर मोडः मोबाइल डेटा बचत गर्ने र अतिरिक्त शुल्कबाट बच्ने सजिलो तरिका

काठमाडौँ । एन्ड्रोइड प्रयोगकर्ताहरूका लागि आफ्नो मोबाइल डेटाको खपत नियन्त्रण गर्ने र डेटा सीमा नाघ्दा लाग्ने अतिरिक्त शुल्कबाट बच्ने एउटा प्रभावकारी उपाय हो, डेटा सेभर (Data Saver) मोड । सीमित डेटा प्लान भएका प्रयोगकर्ताहरूका लागि यो फिचर अत्यन्तै उपयोगी साबित हुन सक्छ ।

यो मोड सक्रिय गरेपछि यसले केही एपहरूलाई पृष्ठभूमिमा (background) डेटा पठाउन वा प्राप्त गर्नबाट रोक्छ । उदाहरणका लागि जब डेटा सेभर अन हुन्छ, ब्राउजरमा कुनै वेबसाइट खोल्दा त्यहाँका तस्बिरहरू प्रयोगकर्ताले नथिचेसम्म लोड हुँदैनन् ।

त्यसैगरी भिडिओ र अडियो पनि आफैँ बज्दैनन् अर्थात् अटोम्याटिक रूपमा प्ले हुँदैनन् । यसले अनावश्यक डेटा खपत घटाउन मद्दत पुर्‍याउँछ ।

एन्ड्रोइडमा डेटा सेभर सक्रिय गर्ने तरिका

यो फिचर सुरु गर्न सबैभन्दा पहिला आफ्नो फोनको सेटिङ्स (Settings) एप खोल्नुहोस् । यसका लागि फोनको नोटिफिकेसन शेडलाई तल तानेर गियर आइकनमा ट्याप गर्नुहोस् वा एप ड्रयरमा गएर सेटिङ्स खोज्नुहोस् । अब सेटिङ्स भित्र रहेको Network & internet अथवा SIMs and mobile network विकल्पमा जानुहोस् र त्यहाँ Data Saver अथवा Data-saving mode खोज्नुहोस् ।

केही एन्ड्रोइड फोनहरूमा यो विकल्प Settings > Mobile network भित्र पनि हुन सक्छ । यति गरिसकेपछि Use Data Saver को छेउमा रहेको स्विचलाई On गर्नुहोस् । केही फोनहरूमा भने नोटिफिकेसन शेडमै यो फिचर उपलब्ध गराइएको हुन्छ । 

डेटा सेभर अन गर्दा सबै एपहरूमा प्रतिबन्ध लाग्ने भएकाले कतिपय एपहरूले राम्रोसँग काम नगर्न सक्छन् । यस्तो अवस्थामा तपाईँले निश्चित एपहरूलाई यो प्रतिबन्धबाट हटाउन सक्नु हुन्छ ।

यसका लागि डेटा सेभर पेजमै रहेको Unrestricted mobile data अथवा App trustlist विकल्पमा ट्याप गर्नुहोस् । त्यहाँ देखिएका एपहरूको सूचीबाट आफूलाई आवश्यक पर्ने एप खोज्नुहोस् र त्यसको स्विच On गर्नुहोस् ।

यसले तपाईँलाई आफ्नो फोनको डेटा प्रयोगमा सोचेभन्दा बढी नियन्त्रण प्रदान गर्नेछ । तर जब तपाईँलाई डेटा सीमा नाघ्ने डर हुँदैन, त्यस्तो अवस्थामा भने यो मोडलाई बन्द गर्न नबिर्सिनुहोस् ।

पछिल्लो अध्यावधिक: बैशाख २०, २०८३ १२:२०

टिप्पणीहरू