यात्रुले बोक्ने पावर बैङ्कका कारण विमानमा जोखिम बढ्दै, बेलायतले जारी गर्यो नयाँ नियम
जेठ १२, २०८३ ८:३६
काठमाडौँ । विमान यात्राका क्रममा पोर्टेबल चार्जर अर्थात् पावर बैङ्कका कारण उत्पन्न हुने समस्याहरू विश्वभर बढ्दै गएको भन्दै बेलायतको नागरिक उड्डयन नियामक निकाय (सीएए) ले गम्भीर चेतावनी जारी गरेको छ । पावर बैङ्कहरू अत्यधिक तातेर आगलागी हुने 'गम्भीर जोखिम' रहेकाले यात्रुहरूलाई सुरक्षा नियमहरू कडाइका साथ पालना गर्न आग्रह गरिएको हो ।
हालै मात्र इजिप्टको हर्गडाबाट लण्डन लुटनका लागि उडेको इजीजेटको एउटा विमानले इटालीको रोममा आकस्मिक अवतरण गर्नुपरेको थियो । एक यात्रुले विमानको होल्ड (चेक-इन ब्यागेज राखिने ठाउँ) मा पावर बैङ्क राखेको जानकारी चालक दललाई दिएपछि सुरक्षा सतर्कता अपनाउँदै विमान डाइभर्ट गरिएको थियो । यस घटनाका कारण यात्रुहरूले रातभर रोममा बस्नुपरेको थियो र अर्को दिन मात्र उनीहरू लण्डन पुगेका थिए ।
तथ्याङ्क अनुसार सन् २०२४ मा मात्रै प्रति हप्ता औसतमा दुईवटा विमानमा थर्मल रनवे (लिथियम-आयन ब्याट्री अत्यधिक तातेर हुने आगलागीको घटना) हुने गरेको छ । सन् २०१९ देखि २०२४ को बीचमा यस्ता घटनाहरूमा १५ प्रतिशतले वृद्धि भएको पाइएको छ ।
सीएएका जोनाथन निकोल्सनलाई उद्धृत गर्दै बीबीसीले यात्रुहरूले अनिवार्य रूपमा पालना गर्नुपर्ने अन्तर्राष्ट्रिय नियमहरू उल्लेख गरेको छ । जसअनुसार पावर बैङ्कहरू कहिल्यै पनि जहाजको होल्डमा राखिने ठुला झोलामा नराख्न र त्यसलाई सधैँ आफूसँगै क्याबिन ब्यागेजमा बोक्नुपर्ने हुन्छ ।
एक जना यात्रुले अधिकतम दुईवटा मात्र पावर बैङ्क बोक्न पाउनेछन् । विमानभित्र पावर बैङ्कको प्रयोग नगर्न र विशेष गरी पावर बैङ्कलाई चार्ज नगर्न कडा निर्देशन दिइएको छ । चार्ज गर्दा यी उपकरणहरू धेरै तातेर आगलागी हुने सम्भावना बढी हुन्छ ।
धेरैजसो एयरलाइन्सहरूले पावर बैङ्कलाई माथिको कम्पार्टमेन्ट (Overhead Bin) मा राख्नुको सट्टा अगाडिको सिटमुनि रहेको झोलामा राख्न सुझाव दिने गरेका छन् ।
पावर बैङ्क किन खतरनाक छन् ?
निकोल्सनका अनुसार डिजिटल क्यामेरा वा ल्यापटपको तुलनामा पावर बैङ्कमा ठुला र शक्तिशाली ब्याट्रीहरू हुन्छन् । यदि यसमा आगलागी भएमा त्यो धेरै भयानक र नियन्त्रण गर्न कठिन हुन्छ । यद्यपि विमानका कर्मचारीहरू यस्ता आगो निभाउन तालिम प्राप्त हुन्छन् । तर जोखिम न्यूनीकरण गर्नु नै उत्तम उपाय हो ।
उनले यात्रुहरूलाई सस्तो र कम गुणस्तरका पावर बैङ्क प्रयोग नगर्न र सम्भव भएसम्म राम्रो गुणस्तरको मात्र खरिद गर्न सल्लाह दिएका छन् । साथै पावर बैङ्कलाई जथाभाबी झोलामा राखेर ठोक्किने वा क्षति पुग्ने गरी नराख्न र मोबाइललाई जस्तै सावधानीपूर्वक सुरक्षित राख्न आग्रह गरेका छन् ।
नोभेम्बर २०२५ मा गरिएको एक सर्वेक्षण अनुसार एक तिहाइभन्दा बढी यात्रुहरूलाई लिथियम ब्याट्रीका नियमहरू रहेको विषयमा थाहा भए पनि ती नियमहरू के हुन् भन्नेमा अझै अन्योल रहेको देखिएको थियो । सर्वेक्षणले ५५ वर्षभन्दा माथिका यात्रुहरू नियमहरूबारे बढी जानकार रहेको देखाएको छ ।
सीएएले यसै गर्मी याममा विमान कम्पनीहरूसँग मिलेर यात्रुहरूका लागि विशेष सचेतना अभियान सुरु गर्ने योजना बनाएको छ । विमान चढ्नुअघि नै आफ्ना विद्युतीय उपकरणहरू फुल चार्ज गर्न र भेप जस्ता उपकरणहरू पनि चेक-इन ब्यागेजमा नराख्न यात्रुहरूलाई पुनः स्मरण गराइएको छ ।
पछिल्लो अध्यावधिक: जेठ १२, २०८३ ८:३६
