काठमाडौं । कम्पनीहरुलाई प्रयोगकर्ताको लगईन डिटेल सुरक्षित राख्ने प्लेटफर्म उपलब्ध गराउँदै आएको ‘ओक्टा’ साइबर हमलामा परेपछि त्यसकाे असर विश्वका सयौं कम्पनीमा परेको अनुमान गरिएको छ ।
ओक्टा आफैंले साइबर आक्रमणबाट आफ्ना सम्पूर्ण ग्राहकमा असर परेको र उनीहरुको डेटा ह्याकरले हेरेको हुनसक्ने बताएको छ ।
कम्पनीमा हाल १५ हजारभन्दा बढी कम्पनीहरु जोडिएका छन् । जसमध्ये फेडएक्स जस्ता ठूला कम्पनी समेत छन् । यस्तोमा केही दिन अघिमात्रै कम्पनीको सिस्टममा साइबर ग्याङ ल्याप्सपले आक्रमण गरेको थियो ।
यो ग्याङले विशेषगरी कम्पनीको सिस्टम ह्याक गरी उनीहरुको महत्वपूर्ण डेटामा पहुँच बनाएर फिरौती माग्ने गर्छ ।
हालै यो ग्याङले माइक्रोसफ्टको ३७ जीबी बराबरको सोर्सकोडको डेटा चोरेको घटना बाहिरिएको छ । माइक्रोसफ्टले पनि आफ्नो सिस्टममा ह्याकरले पहुँच बनाएको स्वीकार गरिसकेको छ ।