ट्वीटरको ब्लू टिक भेरिफिकेसन सुरु, यसरी दिनुहोस् आवेदन

काठमाडौं । माइक्रो-ब्लगिङ साइट ट्वीटरले पुनः ब्लू टिक भेरिफिकेसन प्रक्रिया सुरु गरेको छ । यससँगै अब प्रयोगकर्ताहरूले आफ्नो अकाउन्ट भेरिफाई गराउन आवेदन दिन सक्नेछन् । ट्वीटरले आफ्नो यो कदम अधिक पारदर्शिता र विश्वसनीयता प्रदान गर्ने दिशामा कोशेढुङ्गा हुने उल्लेख गरेको छ ।

यस अघि सन् २०१७ मा ट्वीटरले भेरिफिकेसन प्रक्रिया बन्द गरेको थियो । ट्वीटरका अनुसार अब केवल छ प्रकारका अकाउन्टमा निलो टिक लाग्ने गरी भेरिफाई गराउन सकिनेछ ।

जसमा सरकार, कम्पनी तथा ब्रान्ड, स्पोर्ट्स तथा गेमिङ, मनोरन्जन, पत्रकार र आयोजक तथा प्रभावशाली व्यक्तिहरु समावेश छन् । ट्विटरले यसै वर्षको अन्त्यसम्ममा वैज्ञानिक, शिक्षा र धार्मिक नेता जस्ता श्रेणीका अकाउन्टलाई समेत भेरिफिकेसनमा सहभागी गराउने जनाएको छ ।

यस्तो छ ट्वीटर भेरिफिकेसनको प्रक्रिया

ट्वीटर तपाईं उल्लेखित अकाउन्ट प्रयोगकर्ता हुनुहुन्छ र ट्वीटर भेरिफिकेसनका लागि आवश्यक योग्यता पुरा गर्नु भएको छ भने यसका लागि आवेदन दिन सक्नुहुन्छ । ट्वीटरमा तपाईंको वास्तविक नाम वा त्यस समानको नाम हुनुपर्छ। कम्पनीको सन्दर्भमा समेत यही नियम लागु हुन्छ ।

ट्वीटरमा तपाईंले भेरिफाइड फोन नम्बर, ईमेल आईडी, व्यक्ति वा कम्पनी अथवा ब्रान्डको बारेमा विस्तृत जानकारी समेत उल्लेख गर्नुपर्छ । कम्पनी, ब्राण्ड वा अकाउन्ट प्रयोगकर्ताको वास्तविक तस्वीर उपलब्ध गराउनुपर्छ ।

व्यक्तिगत अकाउन्टको हकमा जन्मदिनको जानकारी उपलब्ध गराउनुपर्छ । ट्वीटरको प्राइभेसी सेटिङमा ट्वीटलाई पब्लिक रुपमा सेट गर्नुपर्ने हुन्छ । सरकारले जारी गरेको परिचयपत्र (नागरिकता, राहदानी वा ड्राइभिङ लाइसेन्स जस्ता कागजात) को स्क्यान कपी अपलोड गर्नुपर्ने हुन्छ ।

कसरी आवेदन दिने ?

• तपाईंले ट्वीटर एप तथा ट्वीटरको वेबसाइटमा रहेको अकाउन्ट सेटिङबाट भेरिफिकेसनका लागि आवेदन दिन सक्नुहुन्छ ।
• त्यसका लागि तीन वटा थोप्ला भएको आइकनमा क्लिक गर्नुहोस् ।
• अब सेटिङ एन्ड प्राइभेसीमा जानुहोस् ।
• आफ्नो अकाउन्टमा जानुहोस् र स्क्रोल गर्दै अकाउन्ट इन्फरमेसनमा गएर भेरिफिकेसन रिक्वेस्टमा ट्याप गर्नुहोस् । त्यहाँ रहेको स्टार्ट रिक्वेस्टमा थिच्नुहोस् ।
• आवश्यक विवरण भरेर सबमिट गर्नुहोस् ।
• त्यस पछि ट्वीटरले तपाईंको अकाउन्ट भेरिफाई भयो वा भएन भन्ने कुराको जानकारी ईमेलमार्फत दिनेछ । यदि तपाईंको अकाउन्ट भेरिफाई भएन भने ३० दिनपछि पुनः यही प्रक्रयाबाट भेरिफिकेसनका लागि निवेदन दिन सक्नुहुनेछ ।

मे २० देखि ट्वीटरले भेरिफिकेसनका लागि आवेदन लिन सुरु गरेको छ । यसमा योग्यता पुगेका जुनसुकै प्रयोगकर्ताले आवेदन दिन सक्नेछन् ।

यदि तपाईंले आफ्नो अकाउन्ट सेटिङ ट्याबमा भेरिफिकेसनको अप्सन देख्नु भएन भने चिन्ता नलिनुहोस् । चाँडै हरेक प्रयोगकर्ताका लागि यो अप्सन खुल्ला हुनेछ ।

पछिल्लो अध्यावधिक: असोज २, २०७९ २२:३१

टिप्पणीहरू