सन्दीपलाई भिसा नदिएपछि अमेरिकी दूतावासको सामाजिक सञ्जालमा नेपाली क्रिकेट समर्थकको आक्रोश
जेठ ९, २०८१ १८:४३
काठमाडौं । नेपालस्थित अमेरिकी दूतावासले क्रिकेटर सन्दीप लामिछानेलाई भिसा दिन अस्वीकार गरेपछि लामिछानेका समर्थकले दूतावासकाे सामाजिक सञ्जालमा आक्रोश पोखेका छन् । दूतावासको फेसबुक पेज र एक्स ह्यान्डलमा क्रिकेट समर्थकले आक्रोश पोखेका हुन् ।
अमेरिका र वेस्ट इन्डिजमा हुने विश्वकप टी-ट्वान्टी क्रिकेट प्रतियोगितामा जान अमेरिकी दूतावासले भिसा नदिएको भन्दै लामिछानेले बुधवार सामाजिक सञ्जालमा पोस्ट गरेका थिए । त्यस लगत्तै लामिछानेको समर्थनमा सामाजिक सञ्जाल प्रयोगकर्ताले आक्रोश पोख्न थालेका हुन् ।
And the @USEmbassyNepal did it again what they did back in 2019, they denied my Visa for the T-20 World Cup happening in USA and West Indies. Unfortunate. I am sorry to all the well wishers of Nepal Cricket. @USAmbNepal @CricketNep. https://t.co/xdBhaY6G91
— Sandeep Lamichhane (@Sandeep25) May 22, 2024
दूतावासले सामाजिक सञ्जाल फेसबुकमा राखेका पोस्ट हेर्ने हो भने ‘एङ्ग्री’ (रिसाएको) रियाक्टको बाढी नै लागेको देख्न सकिन्छ । सामाजिक सञ्जालका पोस्टमा आएका रियाक्सन हेर्ने हो भने ७० प्रतिशत बढी एङ्ग्री रियाक्ट मात्र गरेको देख्न सकिन्छ ।
समर्थकहरूले सो पेजका पोस्टमा कमेन्ट गर्दै लामिछानेलाई भिसा उपलब्ध गराउन दबाब दिएका छन् । त्यसका लागि लामिछानेको समर्थनमा विभिन्न ह्याशट्याग राखिएका छन् । कतिपयले सन्दीपलाई भिसा नदिए दूतावासको भवनमा ढुङ्गामुढा गर्ने चेतावनी समेत दिएका छन् ।
कतिपयले भने लामिछानेलाई भिसा दिन अस्वीकार गर्नुको कारण के भन्दै प्रश्न तेर्साएका छन् ।
पछिल्लो अध्यावधिक: जेठ ९, २०८१ १८:५२
