सस्तोमा ल्यापटप मिलाइदिने भन्दै २७ लाख बढी ठगी गरेको आरोपमा कास्कीका सुजन पौडेल पक्राउ
कात्तिक २५, २०८१ १९:४५
काठमाडौं । अनलाइनबाट सस्तोमा ल्यापटप मिलाइदिने भन्दै ठगी गरेको आरोपमा एक युवक पक्राउ परेका छन् । पक्राउ पर्नेमा माछापुछ्रे गाउँपालिका वडा नं ५ कास्की घर भई ठमेल बस्दै आएका बस्ने २९ वर्षीय सुजन पौडेल रहेका छन् ।
काठमाडौं उपत्यका अपराध अनुसन्धान कार्यालय खटिएको प्रहरी टोलीले शुक्रबार पौडेललाई ठमेलबाट नियन्त्रणमा लिएको हो । कार्यालयका अनुसार आरोपित पौडेलसहित अन्य व्यक्तिहरू अनलाइनमा पीडितलाई सस्तोमा ल्यापटप मिलाइदिने भनेर आश्वासन दिन्थे । त्यसपछि ल्यापटपको मूल्य बराबरको रकम विभिन्न अकाउन्टमा पठाउन लगाउँथे र सामान उपलब्ध नगराई सम्पर्कविहीन हुन्थे ।
यसरी उनले विभिन्न पीडितलाई आश्वासनमा पारी ४० ओटा ल्यापटप उपलब्ध गराइदिने भन्दै २७ लाख ६० हजार रूपैयाँ ठगी गरेको प्रहरीले जनाएको छ । आरोपित पौडेलमाथि अनलाइन ठगी सम्बन्धी कसुरमा थप अनुसन्धान गर्न जिल्ला प्रहरी परिसर भद्रकाली पठाइएको छ ।
पछिल्लो अध्यावधिक: कात्तिक २५, २०८१ १९:४५
