भारतीयसँग मिलेर नेपालमा अनलाइन बेटिङ साइट चलाएको आरोपमा २ जना पक्राउ

काठमाडौं । अनलाइनमार्फत जुवा खेलाएको आरोपमा दुई जना पक्राउ परेका छन् । काठमाडौं उपत्यका अपराध अनुसन्धान कार्यालयले आइतबार  सोह्रखुट्टेबाट दुई जनालाई नियन्त्रणमा लिएको हो ।

पक्राउ पर्नेमा रामेछाप घर भई हाल काठमाडौं बाफल बस्दै आएका ४८ वर्षीय राजप्रकाश श्रेष्ठ र नुवाकोट घर भइ हाल सोह्रखुट्टे बस्दै आएका २३ वर्षीय हरिचन्द्र भुजेल रहेका छन् । कार्यालयका प्रवक्ता एवम् प्रहरी उपरीक्षक काजीकुमार आचार्यका अनुसार राजप्रकाश श्रेष्ठले भारतीय गिरोहको संलग्नतामा नेपालमा अवैध बेटिङ साइट सञ्चालन गरेका थिए । 

“राजप्रकाश पहिले जीपीएसको कारोबार गर्ने मान्छे रहेछन्, पछि उनको भेट भारतीय गिरोहसँग भयो,” प्रहरी उपरीक्षक आचार्यले भने, “उनीहरूले छोटो समयमा राम्रो आम्दानी गर्न सकिन्छ भनेर प्रलोभनमा पारेपछि जुवा खेलाउने प्लेटफर्ममा संलग्न भएको देखिन आएको छ ।”

प्रहरी उपरीक्षक आचार्यका अनुसार पछिल्लो समय नेपाली सर्वसाधारणलाई लक्षित गरी फेसबुकमा आउने अधिकांश अनलाइन बेटिङको विज्ञापनमा राजप्रकाशकै संलग्नता रहेको देखिएको छ । भारतीय गिरोहले प्लेटफर्म निर्माण गरिदिने र त्यसलाई नेपालमा सञ्चालन गर्ने जिम्मा उनले लिएको प्रारम्भिक अनुसन्धानमा देखिएको छ । 

उनले सञ्चालन गर्ने प्रमुख साइट मान्त्रा १०८ एनपी डटकम हो । अर्थात् यो साइट नेपालीहरूलाई नै लक्षित गरी निर्माण गरिएको साइट हो । यसमा जुवा खेलाए बापत आएको आम्दानी मध्ये राजप्रकाशले भारतीय गिरोहलाई ७० प्रतिशत दिने र बाँकी आफूसँग राख्ने गरेको देखिएको छ । 

“रकम पठाउनका लागि बाइनान्स प्रयोग गर्ने रहेछन् । कहिलेकाहीँ भारतीय गिरोह भौतिक रूपमै आएर पैसा लिने गरेको भन्ने बयान दिएका छन्,” प्रहरी उपरीक्षक आचार्यले थपे । अर्का युवक भने आफ्नो बैंक अकाउन्ट प्रयोग भएका कारण समातिएका हुन् । यसमा उनको थप संलग्नता छ वा छैन भन्ने विषय अनुसन्धानकै चरणमा छ ।

पक्राउ परेका राजप्रकाशको मोबाइल फोनमा भएको बाइनान्स आईडीमा दुई करोड ४१ हजार रुपैयाँ बढीको कारोबार भएको देखिएको छ । उनीहरूबाट चार थान मोबाइल, एक थान कम्युटर, ५० ओटा एनसेल तथा नौ ओटा एनटीसी सिम, २७ ओटा एटीएम कार्ड, पाँच ओटा डायरी, सात ओटा चेकबुक र ९० हजार रुपैयाँ बरामद भएको छ । 

यतिका सिम कसको नाममा छन्, अनि कसरी लिइएका हुन् भन्ने विषयमा अनुसन्धान भइरहेको प्रहरी उपरीक्षक आचार्यले बताए । पक्राउ परेका दुवै जनामाथि मुलुकी अपराध संहिता, २०७४ को परिच्छेद-५ को दफा १२५ र दफा २६२ (क) १ बमोजिम मुद्दा चलाइने प्रहरीले जनाएको छ । उनीहरूमाथि थप अनुसन्धान गर्न जिल्ला प्रहरी परिसर, भद्रकाली, काठमाडौं पठाइएको छ ।

पछिल्लो अध्यावधिक: माघ १४, २०८१ १९:४५

टिप्पणीहरू