close

बेलायत लैजान्छु भन्दै नक्कली फेसबुक आईडी बनाई ६ लाख बढी ठगी गर्ने दुई युवक पक्राउ

टेकपाना टेकपाना

फागुन २, २०८१ १६:४१

बेलायत लैजान्छु भन्दै नक्कली फेसबुक आईडी बनाई ६ लाख बढी ठगी गर्ने दुई युवक पक्राउ

काठमाडौं । फेसबुकमा नक्कली आईडी बनाएर विदेश पठाउने प्रलोभन देखाउँदै ठगी गर्ने दुई जना व्यक्ति पक्राउ परेका छन् ।

पक्राउ पर्नेमा काभ्रेपलाञ्चोक चौँडी देउराली गाउँपालिका–७ स्थायी घर भई हाल काठमाडौं, सोह्रखुट्टे बस्ने १९ वर्षीय मनिष भुजेल र काभ्रेपलाञ्चोक भूम्लु गाउँपालिका–४ बस्ने २१ वर्षीय निशान पहारी रहेका छन् ।

'Neyha Gurung' नामक फेक फेसबुक आईडी प्रयोग गरी साथी बनाई विभिन्न कुराकानीपछि डिपेन्डेन्ट भिसामा बेलायत लैजाने प्रलोभन देखाई ६ लाख एक हजार ९५५ रुपैयाँ ठगी गरिएको सूचनाका आधारमा कास्की प्रहरीले अनुसन्धान थालेको थियो ।

यसपछि घटनामा संलग्न भएको आरोपमा भुजेल र पहारीलाई नियन्त्रणमा लिइएको कास्की प्रहरीले जनाएको छ ।

उनीहरूलाई कास्की जिल्ला अदालतबाट ठगी, आपराधिक विश्वासघात तथा आपराधिक लाभ (एक्सटर्सन) सम्बन्धी मुद्दामा सात दिनको म्याद थप गरी अनुसन्धान अघि बढाइएको प्रहरीले जनाएको छ ।

पछिल्लो अध्यावधिक: फागुन २, २०८१ १६:५१