नेपाल मोबिलिटी एक्स्पो २०२५ मा विश्व चर्चित ईभी ब्रान्डहरू देख्न पाइने
जेठ ६, २०८२ १९:२१
काठमाडौँ । नेपाल मोबिलिटी एक्स्पो २०२५ को मुख्य आकर्षण विद्युतीय सवारी (ईभी)मा हुने भएको छ । हालै स्थापना भएको नेपाल अटोमोबाइल आयातकर्ता तथा निर्माता संघ (नाइमा) ले पहिलोपटक आयोजना गर्न लागेको यो एक्स्पो साउन २१ गतेदेखि २५ गतेसम्म काठमाडौँको भृकुटीमण्डपमा हुनेछ ।
संघका अनुसार कुल ४४ स्टल बुकिङ भइसकेका छन्, जसमा अधिकांश स्टल विद्युतीय सवारी साधन प्रदर्शनमा केन्द्रित छन् ।
चार पाङ्ग्रे सवारीको हकमा बीवाईडी, सिट्रोन, फोरथिङ, ग्रेट वाल मोटर्स, हुन्डाई, केई, किया, लिपमोटर, एलईभी वन, महिन्द्रा, म्याक्सस, एमजी, ओमोडा र जेइको, प्रोटोन तथा जिकरजस्ता ब्रान्ड सहभागी हुनेछन् ।
दुई पाङ्ग्रे सवारीमा एथर, गोगोरो, निउ, रिभोल्ट, याडिया र जिहो ब्रान्डका विद्युतीय सवारीहरू प्रदर्शनमा रहनेछन् । यस्तै, व्यावसायिक प्रयोजनका लागि प्रयोग हुने चेरी वान्डा, डोङफेङ, किङलङ, सनलङ, फेरिजोन, ह्वाजी, कामा र केरी ब्रान्डका सवारीसाधन पनि एक्स्पोमा देखिनेछन् ।
आयोजक नाइमाले प्रविधिमैत्री तथा दिगो सवारी साधनप्रति बढ्दो चासोलाई सम्बोधन गर्ने उद्देश्यले यो एक्स्पो आयोजना गर्न लागेको जानकारी दिएको छ ।
पछिल्लो अध्यावधिक: जेठ ६, २०८२ १९:२६
