मेटाले ल्यायो एआईमा आधारित स्मार्ट चस्मा, हातको इसाराबाटै डिस्प्ले कन्ट्रोल गर्न मिल्ने

काठमाडौँ । फेसबुकको मातृ कम्पनी मेटाले आफ्नो वार्षिक डेभलपर सम्मेलन 'मेटा कनेक्ट' मा आर्टिफिसियल इन्टेलिजेन्स (एआई) मा आधारित नयाँ स्मार्ट ग्लास (चस्मा) सार्वजनिक गरेको छ । कम्पनीका प्रमुख मार्क जुकरबर्गले सनग्लास ब्राण्ड रे-बान र ओक्लेसँगको साझेदारीमा बनेका डिभाइस घोषणा गरेका हुन् ।

यसमा मेटा रे-बान डिस्प्लेलाई सबैभन्दा आकर्षणको रूपमा प्रस्तुत गरिएको छ । जसको मूल्य ७९९ अमेरिकि डलर तोकिएको छ । यो चस्माको मुख्य विशेषता यसको दाहिने लेन्सभित्र रहेको पूर्ण रंगको उच्च-रिजोलुसन युक्त स्क्रिन हो । यो स्क्रिनमा प्रयोगकर्ताले भिडिओ कल गर्न, मेसेज हेर्न, दिशाहरू प्राप्त गर्न र अनुवाद हेर्न सक्छन् ।

यसमा १२ मेगापिक्सेलको क्यामेरा जडान गरिएको छ । चस्माको डिजाइन क्लासिक वेफेरर जस्तै छ, ताकि यो धेरै प्राविधिक नदेखियोस् ।

यो चस्मासँगै मेटा न्युरल ब्यान्ड नामक एक रिस्टब्यान्ड पनि आउँछ । यो ब्यान्डले हातका ससाना इसाराहरूलाई पहिचान गरेर चस्माको डिस्प्ले नियन्त्रण गर्न मद्दत गर्दछ । यसले इलेक्ट्रोमायोग्राफी (EMG) प्रविधि प्रयोग गरेर मस्तिष्क र हातबिच पठाइएका सङ्केतहरू पढ्ने दाबी समेत गरिएको छ ।

मेटाले ओक्ले मेटा भ्यानगार्ड र रे बान मेटा (सेकेन्ड जेनेरेसन) गरी अन्य दुई मोडलहरू पनि सार्वजनिक गरेको छ । ओक्ले मेटा भ्यानगार्ड खेलकुदमा रुचि राख्नेहरूका लागि डिजाइन गरिएको हो, जसको मूल्य ४९९ अमेरिकी डलर राखिएको छ । यसले गार्मिन (Garmin) का उपकरणहरूसँग जोडिएर दौड वा अन्य गतिविधिका क्रममा दौडको गति, मुटुको धड्कन र दूरी जस्ता डेटाहरू देखाउन सक्छ ।

त्यस्तै अर्को दोस्रो पुस्ताको रे-बान मेटा भने पुरानो मोडेलकै परिष्कृत संस्करण हो । जसको मूल्य ३७९ अमेरिकी डलर छ । यसमा राम्रो ब्याट्री र उच्च रिजोलुसनको क्यामेरा रहेको छ ।

मार्क जुकरबर्गले यो प्रविधिलाई 'ठुलो वैज्ञानिक सफलता' भनेका छन् । उनले मेटाका एआई उपकरणलाई मानिसहरूको जीवनमा एकीकृत गर्ने बताउँदै आएका छन् । यी चस्माले प्रयोगकर्ताको फोनसँग ब्लुटुथ मार्फत जोडिएर काम गर्दछ । यसमा भएको डिस्प्लेको रिजोलुसन ६००x६०० पिक्सेल छ र यसको ब्राइटनेस ५,००० निट्ससम्म पुग्न सक्छ । जसले गर्दा घाममा पनि डिस्प्ले स्पष्टसँग हेर्न सकिन्छ ।

एउटा डेमोमा प्रत्यक्ष अनुवादको सुविधा देखाइएको थियो । जहाँ चस्माले कुराकानी गरिरहेको व्यक्तिको बोलीलाई तुरुन्तै स्क्रिनमा पाठको रूपमा देखाएको थियो । यद्यपि जुकरबर्गले गरेको प्रस्तुतिको क्रममा केही प्राविधिक समस्याहरू पनि देखिएका थिए; उनले पटक-पटक प्रयास गर्दा पनि चस्मामा ह्वाट्सएप कल सफल हुन सकेन ।

विश्लेषकहरूका अनुसार मेटाको अर्बौँ डलरको मेटाभर्स परियोजनाभन्दा स्मार्ट चस्मा बढी सफल हुने सम्भावना छ । एक समीक्षकले यी चस्माहरूलाई आफूले अहिलेसम्म प्रयोग गरेको 'सबैभन्दा राम्रो' भनेका छन् ।

तर, यसको मूल्य र गोपनीयताका विषयमा केही चिन्ताहरू पनि छन् । एक विश्लेषकले ७९९ को मूल्य धेरै भएकाले यो अन्य सस्ता मोडलहरू जत्तिको लोकप्रिय नहुन सक्ने बताएका छन् । रेडिट प्रयोगकर्ताहरूले मेटाको डेटा सङ्कलन गर्ने तरिकामाथि चिन्ता व्यक्त गरेका छन् ।

मेटा रे-बान डिस्प्ले ३० सेप्टेम्बरदेखि अमेरिकामा उपलब्ध हुनेछ । कम्पनीले सन् २०२६ को सुरुमा क्यानडा, फ्रान्स, इटाली र बेलायतमा पनि बिक्री विस्तार गर्ने योजना बनाएको छ । मेटाले डेभलपरहरूका लागि 'वेयरएबल डिभाइस एक्सेस टुलकिट' पनि ल्याउँदैछ । जसले उनीहरूलाई चस्माका सेन्सरहरू प्रयोग गरेर नयाँ एप बनाउने अवसर पनि दिनेछ।

पछिल्लो अध्यावधिक: असोज ३, २०८२ १२:११

टिप्पणीहरू