रास्वपाको कार्यक्रम भन्दै भीड देखाउने एआई तस्बिर भाइरल, प्रवक्ता भन्छन्ः बदनाम गर्ने षड्यन्त्र

काठमाडौँ । राष्ट्रिय स्वतन्त्र पार्टी (रास्वपा) का सभापति रवि लामिछानेको चितवन भ्रमणका क्रममा खिचिएको भन्दै सामाजिक सञ्जालमा एआई सिर्जित भ्रामक तस्बिर भाइरल भएका छन् । चितवनमा समर्थकलाई सम्बोधन गर्ने क्रममा अस्वभाविक भीड देखाउनका लागि एआईको प्रयोग गरी तस्बिर तोडमोड गरिएको पाइएको हो ।

सामाजिक सञ्जालमा अर्जुन श्रेष्ठ, झक्क प्रसाद आचार्य, इशामाया गुरुङ लगायतका प्रयोगकर्ता र ‘मिम ट्रोल नेपाल’ जस्ता पेजले यस्ता भ्रामक तस्बिर शेयर गरेका छन् ।

‘राष्ट्रिय स्वतन्त्र पार्टी गोरखा’ नामक फेसबुक पेजबाट समेत शेयर भएको एउटा एआई सिर्जित तस्बिरमा ३१ हजारभन्दा बढी रियाक्सन देखिएको छ । कतिपय प्रयोगकर्ताले ‘रुपन्देही कारागारमा उर्लियो जनसागर’ भन्दै गलत क्याप्सन राखेर समेत फोटो फैलाएका छन् ।

भाइरल भइरहेका ती तस्बिरलाई ‘हाइभ मोडेरेसन टुल’ मार्फत परीक्षण गर्दा ९९.६ प्रतिशत एआई सिर्जित वा ‘डिपफेक’ भएको पुष्टि भएको छ । 

सिधाकुरा डटकम, देशसञ्चार र लामिछानेकी पत्नी निकिता पौडेलले सार्वजनिक गरेका वास्तविक तस्बिरसँग तुलना गर्दा भाइरल बनाइएका तस्बिर डिजिटल रूपमा तोडमोड गरिएको स्पष्ट हुन्छ ।

वास्तविक तस्बिर

रास्वपाका प्रवक्ता मनिष झाले यो कार्य पार्टीलाई बदनाम गराउने र आम जनतामा भ्रम फैलाउने नियतले गरिएको बताए । उनले वास्तविक भीड नै ठुलो रहेकाले पार्टीलाई कृत्रिम भीडदेखाउनुपर्ने कुनै आवश्यकता नरहेको स्पष्ट पारे ।

प्रवक्ता झाले भने, “हाम्रो कार्यक्रममा आफैँमा ठुलो जनसहभागिता थियो । एआई प्रयोग गरेर भीड देखाउनुपर्ने अवस्थै छैन । विगतमा अन्य दलका नेताहरूले यस्तै गल्ती गरेको भाष्य निर्माण भएको छ, त्यही कित्तामा हामीलाई पनि उभ्याउन विरोधीहरूले यो षड्यन्त्र गरेका हुन् । उनीहरूले ‘यिनीहरू पनि हामी जस्तै हुन्’ भन्ने देखाउन खोजेका छन् ।”

झाका अनुसार यस्ता भ्रामक सामग्री फैलाउने कार्य कानुनी रूपमा दण्डनीय भएकाले यसबारे नेपाल प्रहरीको साइबर ब्युरोको ध्यानाकर्षण गराइसकिएको छ । ब्युरोले यस्ता गतिविधि रोक्न र सचेतना फैलाउन छिट्टै आवश्यक कदम चाल्ने अपेक्षा उनले व्यक्त गरे । 

पछिल्लो अध्यावधिक: पुस ६, २०८२ १७:३९

टिप्पणीहरू