धनुषामा टिकटकमार्फत धार्मिक अफवाह फैलाउने र मस्जिद तोडफोड गर्ने व्यक्तिहरू पक्राउ

काठमाडौँ । टिकटकमार्फत धार्मिक अफवाह फैलाएको र मस्जिदमा तोडफोड गरेको आरोपमा तीन जना पक्राउ परेका छन् । पक्राउ पर्नेमा धनुषाको कमला नगरपालिका वडा नं. ६, सखुवा टोल बस्ने १९ वर्षीय हैदर अंसारी र सोही उमेरका अमानत अंसारी रहेका छन् । उनीहरूमाथि मुलुकी अपराध संहिता २०७४ को दफा १५६ बमोजिम धर्म सम्बन्धी कसुरमा जिल्ला अदालत धनुषाबाट म्याद थप गरी अनुसन्धान भइरहेको जिल्ला प्रहरी कार्यालय धनुषाले जानकारी दिएको छ ।

प्रहरीका अनुसार टिकटकमा विभिन्न किसिमका अपशब्द प्रयोग गरी समुदाय लक्षित गालीगलौज गरेको र अफवाह फैलाएको आरोपमा उनीहरूलाई नियन्त्रणमा लिइएको हो । त्यसैगरी, सोही विषयलाई लिएर शनिबार दिउँसो करिब २ बजे कमला नगरपालिका वडा नं. ६ स्थित मस्जिदमा तोडफोड गरी कागजातहरू फाल्ने र धार्मिक ग्रन्थहरू जलाएको आरोपमा २५ वर्षीय कपिल भन्ने राम प्रताप साहलाई पनि प्रहरीले नियन्त्रणमा लिएको छ ।

साहलाई मुलुकी अपराध संहिता २०७४ को दफा १५५ बमोजिमको कसुरमा अनुसन्धान अगाडि बढाइएको जिल्ला प्रहरी कार्यालय धनुषाका प्रवक्ता एवं प्रहरी नायब उपरीक्षक गणेश बहादुर बमले जानकारी दिए ।

मस्जिद तोडफोडको घटनामा संलग्न अन्य व्यक्तिहरूको खोजी कार्य जारी रहेको उनले जनाए ।

प्रहरीले टिकटक, फेसबुक, ह्वाट्सएपजस्ता सामाजिक सञ्जालमा कसैको धार्मिक आस्थामा खलल पुर्‍याउने खालका सामग्री पोस्ट गर्ने, लाइक, शेयर वा कमेन्ट गर्ने जोकोहीलाई प्रचलित कानुन अनुसार कडा कारबाही गरिने चेतावनी समेत दिएको छ ।

पछिल्लो अध्यावधिक: पुस २०, २०८२ २३:१७

टिप्पणीहरू