चाँडै नै जेमिनाई एपभित्रै उपलब्ध हुनेछ क्यापकटको भिडिओ एडिटिङ टुल
जेठ १६, २०८३ १८:२५
काठमाडौँ । अबको केही समयमा गुगलको एआई एप ‘जेमिनाई’बाटै क्यापकट जस्तै भिडिओ एडिट गर्न सकिने भएको छ । क्यापकट र जेमिनाई एपबिच हालै मात्र भएको सम्झौतापछि यस्तो फिचर आउने भएको हो ।
यस अन्तर्गत क्यापकटका केही एडिटिङ टुल जेमिनाई एपभित्रै उपलब्ध हुनेछन् । क्यापकटले सामाजिक सञ्जाल एक्समार्फत सार्वजनिक गरेको जानकारी अनुसार प्रयोगकर्ताले छिट्टै जेमिनाई एपको माध्यमबाट क्यापकटका टुल्स प्रयोग गरी फोटो र भिडिओ एडिट गर्न सक्नेछन् ।
यद्यपि, कुन स्तरका टुल कति हदसम्म उपलब्ध गराइनेछन् र यसका लागि कुनै शुल्क तिर्नुपर्ने छ वा छैन वा सब्स्क्रिप्सन मोडेल कस्तो हुन्छ भन्ने विषयमा दुवै कम्पनीले स्पष्ट पारेका छैनन् ।
CapCut is partnering with @GeminiApp .
— CapCut (@capcutapp) May 21, 2026
Soon, users will be able to edit images and videos directly within the Gemini app using CapCut’s advanced creative and editing capabilities.
As creative workflows become more connected and seamless, we believe the future of creation will be… pic.twitter.com/vmbGi9PD4f
यो फिचर जेमिनाई एपमा कहिले उपलब्ध हुन्छ भन्ने विषयमा निश्चित मिति अझै तोकिएको छैन । क्यापकटले यस साझेदारीको औपचारिक घोषणा गरेको भए पनि यी फिचर ‘छिट्टै’ प्रयोगकर्ताका लागि उपलब्ध गराइने मात्र उल्लेख गरेको छ ।
क्यापकटले पछिल्लो समय एआई डिजाइन र इमेज जेनेरेसन लगायतका आफ्नै मोडेल प्रयोग गरी एआई एडिटिङको क्षेत्रमा काम गरिरहेको छ । यस बजारमा क्यापकटको प्रतिस्पर्धा हालै सार्वजनिक भएको इन्स्टाग्रामको नयाँ ‘एडिट्स’ एपसँग भइरहेको छ ।
गुगल र क्यापकटबिच साझेदारी भएको यो पहिलो पटक भने होइन । यसअघि सन् २०२५ को अन्त्यतिर गुगल फोटोजको ‘रिक्याप’ फिचरमा प्रयोगकर्ताका लागि ‘एडिट विथ क्यापकट’ सर्टकट उपलब्ध गराइएको थियो । यसले गर्दा फोटोज एपका फोटोलाई विशेष टेम्पलेटसहित सिधै क्यापकट एपमा एक्सपोर्ट गरेर एडिट गर्न सकिन्थ्यो ।
पछिल्लो अध्यावधिक: जेठ १६, २०८३ १८:२५
