किशोरीको अनुहारमा नाङ्गो तस्वीर जोडी हैरानी दिएको आरोपमा दुई जना पक्राउ

काठमाडौं । अनलाइन माध्यमबाट किशाेरीलाई यौन दुर्व्यवहार गरेको आरोपमा दुई युवक पक्राउ परेका छन् । पक्राउ पर्नेमा सिन्धुपाल्चोक इन्द्रावती गाउँपालिकाका १९ वर्षीय समिर तामाङ र सुरेश तामाङ रहेका छन् ।

नेपाल प्रहरीकाे साइबर ब्यूरोका अनुसार यी युवकले सामाजिक सञ्जाल फेसबुकमा किशाेरीलाई फ्रेन्ड रिक्वेस्ट पठाए । कुरा गर्दै जाँदा बालिकासँग प्रेम सम्बन्धको बहाना बनाए । त्यसपछि अडियो र भिडिओ कलको माध्यमद्वारा मानसिक तनाव दिन थाले ।

त्यसपछि ती बालिकाले उक्त अकाउन्ट ब्लक गरिन् । उनले ब्लक गरेर सम्पर्कविहीन भएपछि पीडकले अन्य अपरिचित व्यक्तिको अश्लील फोटो र भिडिओमा पीडित नाबालिकाको अनुहार जोड़ी (Morphed Image and Video) सामाजिक सञ्जालमा पोस्ट गर्न थाले ।

त्यसपछि किशाेरीका अभिभावकले साइबर ब्यूरोमा उजुरी दिए । उजुरी प्राप्त भएपछि ब्यूरोले त्यस विषयमा अनुसन्धान अगाडि बढायो । अनुसन्धान गर्दै जाँदा समिर र सुरेश मंगलबार पक्राउ परेको ब्यूरोले जनाएको छ ।

पक्राउ परेका दुवै जनालाई काठमाडौं जिल्ला अदालतबाट पाँच दिनको म्याद थप गरी अनुसन्धान भइरहेको छ ।

पछिल्लो अध्यावधिक: साउन २४, २०८० १५:२४

टिप्पणीहरू