त्रिविको रिजल्ट हेर्ने वेबसाइट ह्याकरको नियन्त्रणमा
माघ १६, २०८० २३:४६
काठमाडौं । त्रिभुवन विश्वविद्यालय परीक्षा नियन्त्रण कार्यालय (पनिका), बल्खुकाे वेबसाइट (tuexam.edu.np) ह्याकरको नियन्त्रणमा पुगेको पाइएको छ । मंगलबार बेलुकीदेखि उक्त वेबसाइट ह्याकरको नियन्त्रणमा गएको र साइट खोल्दा 'रोहित रोकाया' नामको फेसबुक प्रोफाइलमा रिडाइरेक्ट भएको पाइएको हो ।
वेबसाइट खोल्दा असम्बन्धित व्यक्तिको फेसबुक प्रोफाइलमा रिडाइरेक्ट भएकाे खबर फैलिएपछि अहिले उक्त वेबसाइट खोल्दा 'मेन्टेनेन्स' भइरहेको सन्देश राखिएको छ ।
पनिकाले सोमबारदेखि ट्रान्सक्रिप्टसहित विभिन्न प्रमाणपत्र सम्बन्धी सेवा अनलाइनमा आधारित बनाएको थियो । वेबसाइट ह्याक घटनाबाट केके क्षति भयो भन्नेबारे जानकारी आउन बाँकी छ ।
साइबर सुरक्षामा खोज तथा अनुसन्धान गरिरहेका सौगात पोखरेलले त्रिविको वेबसाइटमा कसैले अनधिकृत पहुँच पुर्याएको हुनसक्ने बताए ।
''सोमबारदेखि त्रिविले अनलाइन सेवा सुरु गरेसँगै यसले त्रिविको वेबसाइटमा अट्याक सर्फेस पनि बढाएको छ । अब लाखौं विद्यार्थीको संवेदनशील डेटा समेत पाइने भएकाले त्रिविको वेबसाइट ह्याकरको निशानामा पर्ने सम्भावना अझ धेरै हुन्छ । यसले गर्दा उक्त वेबसाइटमा सुरक्षा चुनौती थपिएको छ,'' पोखरेलले फेसबुक पोस्टमा भनेका छन् ।
वेबसाइटमा देखिएको समस्याबारे त्रिविले आधिकारिक प्रतिक्रिया दिइसकेकाे छैन ।
पछिल्लो अध्यावधिक: माघ १७, २०८० ८:३१
