एसईईः विद्यालयको पर्खाल नाघेर चिट चोराइएको भिडिओ सामाजिक सञ्जालमा भाइरल
चैत ८, २०८१ ९:१३
काठमाडौं । बिहीबारदेखि सुरु भएको एसईई परीक्षामा चिट चोराइरहेको भन्दै केही भिडिओ सामाजिक सञ्जालमा भाइरल भएका छन् । विभिन्न विद्यालय बाहिरबाट एसईई दिइरहेका विद्यार्थीहरूलाई चिट पुर्याइरहेको देखिने भिडिओ टिकटक, फेसबुकलगायतका प्लेटफर्ममा भाइरल बनेका छन् ।
एक भिडिओमा मधेश प्रदेशका केही स्थानमा चिट चोराइएको आशयसहितका दृश्य देख्न सकिन्छ । भाइरलमध्ये एक भिडिओमा विद्यालयको पर्खालमा चढेर एक युवकले चिट पास गरिरहेका छन् । उक्त भिडिओ रौतहटको मौलापुर नगरपालिका–६, पथराबुधामस्थित श्री माध्यमिक विद्यालयको भएको देखिन्छ । गेटबाहिर युवाहरूको ठुलो समूह बसिरहेको देखिन्छ ।
यस्तै, अर्को भाइरल भिडिओमा चिट पुर्याउन युवाहरू पर्खाल नाघेर विद्यालयको माथिल्लो तलासम्म पुगेको देख्न सकिन्छ । उक्त भिडिओ महोत्तरीको भएको बताइएको छ । त्यस्तै, कक्षाकोठाभित्र भुइँमा विद्यार्थीहरूले चिट छरपस्ट फालेको दृश्य देखिने अर्को भिडिओ पनि भाइरल भइरहेको छ ।
बिहीबार बिहान ८ बजेदेखि अङ्ग्रेजी विषयको परीक्षा सुरु भएको थियो । परीक्षा सुरु भएको एक घण्टाभित्रै अङ्ग्रेजी विषयको प्रश्नपत्र फेसबुकमा भाइरल भइसकेको थियो ।
उक्त भिडिओ सार्वजनिक भएपछि धेरै प्रयोगकर्ताले नेपालको शैक्षिक गुणस्तरप्रति चिन्ता व्यक्त गरेका छन् । एक प्रयोगकर्ताले लेखेका छन्, “नसुध्रिएको प्रशासनको नसुध्रिएका विद्यार्थी ।”
यसैबिच जिल्ला प्रहरी कार्यालय रौतहटले जिल्लाभरि एसईई परीक्षाका क्रममा चिट चोर्नका लागि परीक्षा हलमा लगिएका ४२४ थान मोबाइल बरामद गरेको जानकारी दिएको छ ।
यस्तै, यमुनामाई गाउँपालिका-५ स्थित यमुनामाई माध्यमिक विद्यालयको परीक्षा केन्द्रमा विद्यार्थीबाट पैसा लिएको आरोपमा एक परीक्षा निर्देशकलाई नियन्त्रणमा लिइएको छ ।
साथै, रौतहटको मौलापुर नगरपालिका–५ स्थित लक्ष्मिनिया मावि परीक्षा केन्द्रबाट बाहिरबाट चिट पुर्याउने केही व्यक्तिहरूलाई समेत पक्राउ गरिएको छ ।
पछिल्लो अध्यावधिक: चैत ८, २०८१ १०:१३
