१२ वर्षीया बालिकाले अनलाइन पो'र्न साइट चलाएको खुलासा भएपछि कानुनी दुविधामा मलेसियाली सरकार
भदौ ४, २०८२ १६:२६
काठमाडौँ । मलेसियामा एक १२ वर्षीया बालिकाले आफ्ना चार साथीहरूसँग मिलेर एउटा अश्लील वेबसाइट सञ्चालन गरेको र त्यसका लागि ७६२ सदस्य रहेको ह्वाट्सएप ग्रुप समेत चलाएको खुलासा भएको छ । यो ग्रुप र वेबसाइटमा शरीरका अङ्गहरूका फोटो आदानप्रदान तथा बिक्री हुने गरेको मलेसियाका गृहमन्त्री दातुक सेरी सैफुद्दिन नासुसनले बताएका छन् ।
गृहमन्त्री नासुसले संसदमा सम्बोधन गर्दै यो घटनाले कानुन कार्यान्वयन निकायहरूलाई नाबालिगहरूसँग सम्बन्धित मुद्दाहरूमा सामना गर्नुपर्ने जटिल कानुनी र नैतिक चुनौतीहरू उजागर गरेको बताए ।
उनले भने, "उनीहरूले आफ्ना शरीरका अङ्गका फोटोहरू खिचेर बेच्थे । बालिकाको मासिक आम्दानी आफ्ना आमाबाबुको संयुक्त कमाइभन्दा बढी भएपछि उनले विद्यालयसमेत छोडिन् ।" यसले प्रविधिको दुरुपयोगबाट कसरी नाबालिगहरू आर्थिक प्रलोभनमा पर्न सक्छन् भन्ने भयावह तस्बिर प्रस्तुत गरेको छ ।
नाबालिगहरूविरुद्ध कारबाही गर्दा कानुनी र नैतिक दुविधाहरू उत्पन्न हुने गृहमन्त्रीले स्वीकार गरे । मलेसियाको मानवअधिकार आयोगले बालबालिकाहरूलाई खुला अदालतमा मुद्दा चलाउन नमिल्ने भन्दै आएको छ । यस्तो अवस्थामा उनीहरूको भविष्य के हुन्छ भन्ने प्रश्न उठ्ने र यसका लागि अन्य एजेन्सीहरूको पनि सहयोग आवश्यक पर्ने उनको भनाइ छ ।
यस जटिल समस्यालाई सम्बोधन गर्न गृहमन्त्रालयले महिला, परिवार तथा समुदाय विकास, सञ्चार तथा शिक्षा मन्त्रालयलगायत अन्य एजेन्सीहरूसँग नजिकबाट सहकार्य गरिरहेको छ । गृहमन्त्री नासुसनले कानुन प्रशासनलाई रोकथामका उपायहरूसँग जोड्नुपर्ने कुरामा जोड दिए, विशेषगरी परिवार र समुदायभित्र असल मूल्यमान्यताको विकास गर्नुपर्ने उनले बताए । उनले भने, "यदि प्रविधि गलत उद्देश्यका लागि प्रयोग गरिएमा हानिकारक परिणामहरू ल्याउन सक्छ ।"
पछिल्लो अध्यावधिक: भदौ ४, २०८२ १६:२६
