मुम्बईमा अनलाइन ठगी गरेको आरोपमा एक नेपाली सुरक्षा गार्ड पक्राउ, ‘रम्मी’ खेलेर पैसा उडाएको आरोप

काठमाडौँ । भारतको मुम्बईमा साइबर ठगी गरेको आरोपमा एक नेपाली सुरक्षा गार्ड पक्राउ परेका छन् । बाङ्गुर नगर प्रहरीले उनलाई एक महिलाको फिक्स डिपोजिटलाई प्रयोग गरेर अनलाइनमार्फत ऋण लिएर पैसा निकाल्ने साइबर अपराध गरेको आरोपमा पक्राउ गरेको हो । यद्यपि ती सुरक्षा गार्डको परिचय भने प्रहरीले खुलाएको छैन ।

प्रहरीका अनुसार अभियुक्तले निकालेको २.७९ लाख रुपैयाँमध्ये धेरैजसो रकम रम्मी (कार्ड गेम) खेलेर उडाएको पाइएको छ । प्रहरीले हाल उनका सहयोगीहरूको खोजी गरिरहेको छ । ५८ वर्षीया पीडित महिला घरेलु कामदार हुन् र उनले आफ्नी किशोर छोरीको पढाइका लागि पैसा बचत गरिरहेकी थिइन् । उनका ६३ वर्षीय श्रीमान् पहिले मजदुरका रूपमा काम गर्थे र हाल घरमा बस्छन् ।

पीडित महिलाले वर्षौँदेखि सरसफाइको कामबाट पैसा बचत गर्दै आएकी थिइन् । सन् २०२४ जुनमा उनले आफ्नो खाता रहेको एक बैँक शाखामा गएर ७३० दिनको अवधिका लागि २ लाख रुपैयाँ फिक्स डिपोजिटमा राखिन् । त्यसपछि पछि उनले बैँकमा ४०० दिनको अवधिका लागि अर्को १ लाख रुपैयाँमा थप दुई वटा फिक्स डिपोजिट गरिन् ।

हालै उनी काममा हुँदा आफ्नो बैँकबाट एउटा पाठ मेसेज प्राप्त गरिन्, जुन उनले बुझ्न सकिनन् । भोलिपल्ट उनी र उनका श्रीमान् बैँकमा जाँदा एउटा फिक्स डिपोजिटबाट ९३ हजार रुपैयाँ र अर्कोबाट १ लाख ८६ हजार रुपैयाँ ऋण लिइएको थाहा पाएर चकित भए ।

उनको खातामा इन्टरनेट बैङ्किङ सुविधा सक्रिय गरिएको र ऋण रकम कसैलाई हस्तान्तरण गरिएको थियो । ती महिला र उनका श्रीमान्‌ले आफूहरूले कुनै ऋण नलिएको तथा इन्टरनेट बैङ्किङ सक्रिय नगरेको स्पष्ट पारे । त्यसपछि उनीहरूलाई साइबर अपराध हेल्पलाइन ‘१९३०’ मा डायल गरेर उजुरी दर्ता गर्न सल्लाह दिइयो ।

एफआईआर दर्ता भएपछि बाङ्गुर नगर प्रहरीले महिलाको पैसा ट्रान्सफर गरिएको खाता सञ्चालन गर्ने व्यक्तिको पत्ता लगाए । ती व्यक्ति एक सुरक्षा गार्ड रहेको पत्ता लाग्यो । विद्यालय छाडेका ती गार्ड विगत दुई दशकदेखि उक्त सहरमा बस्दै आएका छन् र सामान्य तलब कमाउँछन् । प्रहरीले अब उनलाई बैँकभित्रकै कसैले सहयोग गरेको थियो वा साइबर अपराधीले झुक्याएर ट्रान्सफरका लागि उनको बैँक खाता प्रयोग गरेको थियो कि भन्नेबारे अनुसन्धान गर्ने टाइम्स अफ इन्डियाले लेखेको छ ।

पछिल्लो अध्यावधिक: भदौ ९, २०८२ १७:२९

टिप्पणीहरू