अब च्याटजीपीटीमा पनि विज्ञापन देखिने

काठमाडौँ । ओपनएआईले च्याटजीपीटीमा विज्ञापन देखाउने तयारी गरेको छ । शुक्रबार एक विज्ञप्ति जारी गर्दै कम्पनीले अमेरिकाका वयस्क प्रयोगकर्ताका लागि निःशुल्क संस्करणमा विज्ञापनको परीक्षण सुरु गर्न लागेको जानकारी दिएको हो ।

यसका साथै कम्पनीले विश्वभरका प्रयोगकर्ताका लागि मासिक ८ डलर शुल्क पर्ने नयाँ ‘गो’ सब्सक्रिप्सन योजना पनि सार्वजनिक गरेको छ । यो हाल कायम रहेको २० डलरको ‘प्लस’ र २०० डलरको ‘प्रो’ योजनाभन्दा निकै सस्तो छ । ‘गो’ सब्सक्रिप्सनमा प्रयोगकर्ताले लामो ‘मेमोरी’ र थप तस्बिर बनाउने सुविधा पाउनेछन्, तर यसमा विज्ञापन भने समावेश हुनेछन् । 

त्यस्तै प्लस, प्रो र बिजनेस ग्राहकले भने विज्ञापनरहित सेवा नै पाउनेछन् ।

In the coming weeks, we plan to start testing ads in ChatGPT free and Go tiers.

We’re sharing our principles early on how we’ll approach ads–guided by putting user trust and transparency first as we work to make AI accessible to everyone.

What matters most:
- Responses in… pic.twitter.com/3UQJsdriYR

— OpenAI (@OpenAI) January 16, 2026

ओपनएआईका सीईओ साम अल्टम्यानले यसअघि च्याटजीपीटीमा विज्ञापन राख्ने कुरामा असहमति जनाउँदै आएका थिए । तर, कम्पनीले आगामी आठ वर्षमा एआई पूर्वाधार विकासका लागि खर्च गर्ने भनिएको १.४ ट्रिलियन डलरका लागि ठूलो रकम जुटाउनु पर्ने दबाब छ । ८० करोड मासिक प्रयोगकर्ता रहेको ओपनएआईले सन् २०२५ को अन्त्यसम्ममा वार्षिक राजस्व २० अर्ब डलर पुग्ने लक्ष्य राखेको छ ।

विज्ञापनको मोडेललाई प्रभावकारी बनाउन ओपनएआईले प्रयोगकर्ताको कुराकानीको प्रसङ्गलाई आधार मान्नेछ । उदाहरणका लागि यदि कुनै प्रयोगकर्ताले भ्रमणको योजनाबारे सोधेमा च्याटजीपीटीले सम्बन्धित ठाउँका होटल वा मनोरञ्जनका विज्ञापन देखाउन सक्नेछ ।

विज्ञापन च्याटजीपीटीको जवाफको तल ‘Sponsored’ ट्यागका साथ देखिनेछन् । कम्पनीले विज्ञापनका कारण च्याटजीपीटीको जवाफको निष्पक्षता प्रभावित नहुने स्पष्ट पारेको छ । प्रयोगकर्ताले चाहेमा आफ्नो कुराकानीका आधारमा देखाइने विज्ञापनलाई बन्द गर्न सक्ने सुविधा पनि दिने उल्लेख गरेको छ ।

ओपनएआईले स्वास्थ्य मानसिक स्वास्थ्य र राजनीति जस्ता संवेदनशील विषयका कुराकानीमा विज्ञापन नदेखाउने र प्रयोगकर्ताको निजी डेटा विज्ञापनदातालाई नबेच्ने प्रतिबद्धता जनाएको छ । साथै १८ वर्षभन्दा कम उमेरका प्रयोगकर्तालाई पनि विज्ञापन देखाइने छैन ।

एआई च्याटबटमार्फत सामान बेच्ने र विज्ञापन गर्ने प्रतिस्पर्धामा ओपनएआई एक्लो छैन । गत डिसेम्बरदेखि मेटाले पनि आफ्नो एआई च्याटबटमार्फत विज्ञापन देखाउन सुरु गरिसकेको छ ।

यद्यपि, च्याटबटमा विज्ञापन राख्ने विषय केही विवादास्पद पनि बन्न सक्छ । प्रयोगकर्ताले च्याटजीपीटीसँग अत्यन्तै व्यक्तिगत कुराकानी गर्ने भएकाले गोपनीयताको प्रश्न उठ्न सक्ने चिन्ता छ । यसअघि च्याटजीपीटीले हानिकारक सल्लाह दिएका कारण मुद्दा खेपिरहेको सन्दर्भमा विज्ञापन मार्फत सिफारिस गरिने उत्पादन सुरक्षित हुनुपर्ने अर्को चुनौती कम्पनीसामु छ ।

पछिल्लो अध्यावधिक: माघ ३, २०८२ ९:५१

टिप्पणीहरू