बजेट रेन्जरोभर ठानेर लिएको जे-५ ईभी, एरोडाइनामिक कारको जमानामा कस्तो छ बक्सी डिजाइनको अनुभव ?

काठमाडौँ । नेपालको विद्युतीय सवारी (ईभी) बजार तीव्र गतिमा विस्तार भइरहेको छ । यहाँ धेरैजसो गाडीहरू चिल्लो र एरोडाइनामिक डिजाइनमा आइरहेका छन् । तर एउटा गाडीले भने आफ्नो बक्सी (बाकस जस्तो) बलियो र आकर्षक 'रेट्रो' लुक्सले सबैको ध्यान खिचिरहेको छ । त्यो हो- जेको जे-५ (Jaecoo J5) ।

टेकपानाको अनर रिभ्युको पछल्लो एपिसोडमा नेपालमा जेको जे-५ खरिद गर्ने सुरुवाति ग्राहकहरूमध्येका एक दिवस श्रेष्ठले आफ्नो अनुभव शेयर गरेका छन् । यो 'बजेट रेन्ज रोभर' जस्तो देखिने गाडीले प्रचार गरिए जस्तो प्रर्पर्मेन्स दिन्छ कि दिँदैन ? नयाँ ईभी खरिद गर्ने विषयमा सोचिरहेका उपभोक्ताका लागि उनको अनुभवबाट यो प्रश्नको जवाफ खोज्ने प्रयत्न गरेका छौँ ।

अस्ट्रेलिया र नेपालमा समय बिताउने श्रेष्ठका लागि जेको जे-५ को रोजाई सिधा थिएन । नेपाली ईभी बजारमा अनेकौँ विकल्पहरू छन्, जसले गर्दा कुन गाडी रोज्ने भन्नेमा ग्राहकहरू अलमलमा पर्ने गरेका हुन्छन् ।

"सुरुमा त मैले बीवाइडी एटो ३ लिने निर्णय गरेको थिएँ," श्रेष्ठले खुलाए, "मैले बुकिङ पनि गरिसकेको थिएँ र सबै कुरा तयार थियो । तर दसैँसम्ममा गाडी आउन सकेन र म अस्ट्रेलिया जानुपर्ने भयो, त्यसैले मैले त्यो बुकिङ रद्द गरेँ ।"

उनी फर्किएपछि बजार फेरि परिवर्तन भइसकेको थियो । उनले एमजी जेडएस ईभीलाई विचार गरे र केही समयको लागि दीपाल एस०७ ले पनि लोभ्यायो । तर, जब जेको जे-५ को आगमन भयो, उनको निर्णय बदलियो ।

"मलाई रेन्ज रोभर एकदमै मन पर्छ," श्रेष्ठले हाँस्दै भने, "र यो गाडी, साइडबाट हेर्दा ठ्याक्कै 'बजेट रेन्ज रोभर' जस्तै देखिन्छ । साथै, यसको प्यारेन्ट ब्रान्ड चेरीमाथि मलाई विश्वास थियो । त्यसैले मैले यो गाडी किन्ने निधो गरेँ ।"

नेपाली सडकमा 'बेबी रेन्ज रोभर'

करिब ५६ लाख रुपैयाँमा पर्ने जे-५ ले काठमाडौँका सडकमा एउटा छुट्टै उपस्थिति जनाउँछ । तर लुक्स मात्र सबथोक होइन, विशेषगरी नेपालको कठिन भूगोलमा ।

आफूलाई स्वतन्त्र चालक बताउने श्रेष्ठले यो गाडीमा त्यति धेरै लामो यात्रा त गरेका छैनन् । यद्यपि १२ सय किलोमिटरभन्दा बढी यात्राका क्रममा कुलेखानी जस्ता अलि अप्ठ्यारा बाटाहरूमा भने ड्राइभिङ अनुभव लिइसकेका छन् ।

"यसको ग्राउन्ड क्लियरेन्स १८५ एमएम भनिएको छ र इमानदारीपूर्वक भन्नु पर्दा यो पर्याप्त छ," श्रेष्ठले भने, "अहिलेसम्म अप्ठ्यारो बाटोमा पनि गाडीको तल्लो भाग कतै ठोक्किएको छैन ।"

यद्यपि, उनी ड्राइभिङ अनुभवबाट शतप्रतिशत सन्तुष्ट भने छैनन् । श्रेष्ठले सुधार गर्नुपर्ने दुई वटा कुराहरू औँल्याए: सस्पेन्सन र टायर । "सस्पेन्सन ठिकठाक मात्र छ । यो अझै स्मुथ (नरम) हुन सक्थ्यो; चलाउँदा अलि कडा महसुस हुन्छ । र स्टक टायरहरू ? ब्रेक लगाउँदा अलि चिप्लिने (स्किड) गर्छन् । यदि मैले दुईवटा कुरा सुधार्न मिल्थ्यो भने म यिनै कुराहरू रोज्ने थिएँ ।"

प्रविधि र इन्टेरियर अनुभव

जेको जे-५ को भित्री भाग (इन्टेरियर) ले भने मूल्य अनुसार राम्रो अनुभव दिन्छ । श्रेष्ठले व्यावहारिक कारणले डार्क इन्टेरियर रोजेका थिए । आफैँ अग्लो कदका भएकाले उनका लागि क्याबिनको स्पेस निकै महत्त्वपूर्ण थियो ।

"मैले धेरै गाडीहरू चलाएको छु, जहाँ मेरो टाउको सिलिङमा ठोक्किन्छ वा घुँडा खुम्च्याएर बस्नुपर्छ । तर यसमा लेगरुम र हेडरुम उत्कृष्ट छ, अगाडि र पछाडि दुवै सिटमा । यसमा ५ जना आरामसँग अटाउँछ," उनले भने ।

गाडीमा रहेको प्रविधिले पनि उनको मन जितेको छ । यसमा सोनीको साउन्ड सिस्टम छ, जसलाई श्रेष्ठले निकै राम्रो मानेका छन् । साथै, ३६०-डिग्री क्यामेरा सिस्टमलाई उनले काठमाडौँको अस्तव्यस्त ट्राफिकमा 'जीवन रक्षक' कै संज्ञा दिए ।

"सेन्सर र क्यामेराहरू एकदम सटीक छन् । हाम्रो ट्राफिकमा, जहाँ बाइकहरूले जथाभाबी ओभरटेक गर्छन्, साइड मिररमा आउने ब्लाइन्ड-स्पट वार्निङ र स्क्रिनमा देखिने ३६०-भ्यु अति आवश्यक छ । म एडास (ADAS) फिचरहरू अन नै राख्छु, यद्यपि बम्पर-टु-बम्पर ट्राफिकमा अटो-ब्रेकिङ कहिलेकाहीँ झर्को लाग्दो हुन सक्छ," उनले थपे ।

रेन्जको छैन चिन्ता 

जेको जे-५ ले करिब ४६० किलोमिटरको रेन्ज दिने दाबी गरिएको छ । तर वास्तविक सडकमा यो केही फरक हुन्छ, यद्यपि त्यसलाई श्रेष्ठले सन्तोषजनक नै मानेका छन् । उनका अनुसार फुल चार्ज गर्दा इको ड्राइभिङ मोडमा ३८० देखि ४०० किलोमिटरसम्म गुडाउन सकिन्छ ।

उनको चार्जिङ बानी निकै सरल छ । "म प्रायः घरमै ३.३ किलोवाटको स्लो चार्जर प्रयोग गरेर लगभग ९५% सम्म चार्ज गर्छु । म यसलाई रातभर प्लग गरेर छोड्छु । मलाई रेन्जको खासै चिन्ता छैन ।"

यद्यपि, अनुभव पूर्ण रूपमा समस्या मुक्त भने छैन । श्रेष्ठ हाल वैकल्पिक स्लो चार्जरबाट गाडी चार्ज गरिरहेका छन् । किनभने गाडीसँगै आउनुपर्ने ७ किलोवाटको होम चार्जर र स्पेयर टायर भन्सारमा अड्किएको छ ।

"यो अलि निराशाजनक छ," ढिलाइबारे श्रेष्ठले भने, "गाडी यहाँ छ, तर चार्जर र स्पेयर टायर भन्सारको प्रक्रियामा फसेको छ । यो त हात्ती छिर्‍यो, पुच्छर अड्कियो भनेजस्तै भयो ।"

सस्पेन्सन र एक्सेसरिजको भन्सारको सुस्ति जस्ता सानोतिना गुनासोहरू भए पनि श्रेष्ठ यो ईभीलाई लिएर खुसी नै छन् । गाडीलाई रेटिङ दिन सोधिएको प्रश्नमा उनले कुनै हिचकिचाहट बिना जवाफ दिए ।

"म यसलाई १० मा ८.५ वा ९ दिन्छु," उनले निष्कर्षमा भने । "यदि यो साँच्चिकै रेन्ज रोभर भएको भए सायद १० दिन्थेँ होला । तर यो मूल्यमा यी फिचर र यो लुक्सका लागि यो एकदमै राम्रो हो ।"

काठमाडौँका कच्ची र पक्की सडकहरूमा जेको जे-५ ले आफ्नो बाकस जस्तो आकृतिका कारण मात्र नभई, भविष्यमुखी डिजाइनमा केन्द्रित बजारमा नयाँ जमानाको ब्याट्रीबाट चल्ने पुरानो जमानाको रफ एण्ड टफ गाडीको लागि पनि पर्याप्त ठाउँ छ भन्ने देखाएको छ ।

पछिल्लो अध्यावधिक: माघ १९, २०८२ १४:१०

टिप्पणीहरू