गुगल जीबोर्डमा नयाँ भर्चुअल ट्र्याकप्याड फिचर, अब टाइप गर्दा गल्ती सुधार्न अझ सहज हुने

काठमाडौँ । एन्ड्रोइड प्रयोगकर्ताहरूका लागि सबैभन्दा लोकप्रिय किबोर्ड एपमध्येको एक जीबोर्डले टाइपिङ अनुभवलाई अझ राम्रो बनाउन एउटा नयाँ अपडेटको तयारी गरिरहेको छ । एन्ड्रोइड पुलिसका अनुसार गुगलले जीबोर्डमा नयाँ कर्सर मोड (Cursor Mode) परीक्षण गरिरहेको हो ।

यो मोडले प्रयोगकर्तालाई लामो टेक्स्ट वा मेसेजमा भएका गल्तीहरू छिटो र सजिलोसँग सच्याउन मद्दत गर्नेछ । हाल जीबोर्डमा ग्लाइड कर्सर कन्ट्रोल (Glide cursor control) सुविधा उपलब्ध छ, जसमा स्पेसबारमा औँलाले देब्रे वा दाहिने स्वाइप गरेर एउटै लाइनभित्र कर्सर सार्न सकिन्छ ।

यो सुविधा एउटै लाइनमा भएका हिज्जे सच्याउन उपयोगी भए तापनि एक लाइनबाट अर्को लाइनमा (माथि वा तल) कर्सर लैजान निकै ढिलो र झन्झटिलो हुने गरेको छ ।

एन्ड्रोइड अथोरिटीले गरेको जीबोर्डको नयाँ बेटा भर्सन (१६.८.२) को प्राविधिक विश्लेषण (APK teardown) अनुसार गुगलले यो कमजोरीलाई सुधार्न भर्चुअल ट्र्याकप्याडको अवधारणा ल्याएको हो । अब प्रयोगकर्ताले स्पेसबारलाई केही बेर थिचेर (Tap and Hold) राखेमा किबोर्डको इन्टरफेस हराउनेछ र त्यो ठाउँ एउटा ट्र्याकप्याडमा परिणत हुनेछ ।

यो ट्र्याकप्याडको सहयोगले कर्सरलाई ल्यापटपको माउस जस्तै जुनसुकै दिशामा सहजै सार्न सकिनेछ । जसले गर्दा धेरै हरफ भएका टेक्स्टहरूमा कर्सर राख्न निकै सजिलो हुनेछ ।

यो प्रविधि एन्ड्रोइडका लागि पूर्ण रूपमा नयाँ भने होइन । स्विफ्टकी (SwiftKey) किबोर्डमा यो सुविधा पहिलेदेखि नै उपलब्ध छ । गुगलले पनि अब आफ्ना अर्बौँ प्रयोगकर्ताहरूका लागि यही प्रभावकारी फिचर ल्याउन लागेको हो ।

गुगलले यो फिचर आधिकारिक रूपमा कहिले सार्वजनिक गर्छ र यसले पुरानो ग्लाइड फिचरलाई पूर्ण रूपमा प्रतिस्थापन गर्छ कि गर्दैन भन्ने बारे अझै ठोस जानकारी दिएको छैन । हाल यो परीक्षणको चरणमा रहेको हुँदा आगामी केही महिनाभित्रै सबै प्रयोगकर्ताका लागि उपलब्ध हुन सक्ने अपेक्षा गरिएको छ । टाइपिङको गति र शुद्धता बढाउन चाहनेहरूका लागि यो अपडेट एउटा महत्त्वपूर्ण सुधार साबित हुन सक्छ ।

पछिल्लो अध्यावधिक: चैत १०, २०८२ १६:५३

टिप्पणीहरू