काठमाडौं । मलेसियामा जारी पब्जी मोबाइल ग्लोबल च्याम्पियनशिपका लागि दोस्रो नेपाली टिम स्काइलाइट गेमिङ आज मलेसिया प्रस्थान गरेको छ । प्रतियोगिताको 'ग्रीन ग्रुप' मा रहेको यो टोलीको खेल नोभेम्बर १७ बाट सुरु हुनेछ ।
यसैका लागि टोली आज नेपालबाट मलेसियाको लागि हिँडेको हो । टोलीमा हाल अजय श्रेष्ठ (एजे), उगेन लामा (माफिया निन्जा), अन्जन राई (मिस्टर बोरो) र निमा तामाङ (निमा) लगायतका खेलाडी छन् ।
टोलीले नोभेम्बर १७ बाट खेल खेल्नेछ । विश्वभरबाट ५१ टिम सहभागी प्रतियोगितामा नेपालबाट डीआरएस गेमिङ, ट्रेन टु किल र स्काइलाइट गेमिङ गरी तीन टिमले प्रतिस्पर्धा गरिरहेका छन् ।
यसमध्ये डीआरएस मलेसिया गएर १२ खेल खेलिसकेको छ भने ट्रेन टु किल नोभेम्बर २४ देखि सुरु हुने खेलका लागि मलेसिया जाने तयारीमा छ ।