सामसङले ल्यायो मोबाइलमा जस्तै गरी हेर्न मिल्ने टिभी

काठमाडौं । दक्षिण कोरियाको कञ्जुमर इलेक्ट्रोनिक्स ब्रान्ड सामसङले आफ्नो पहिलो भर्टिकल फोरके एलईडी टिभी सेरो सार्वजनिक गरेको छ । कोरियन भाषामा सेरोको अर्थ भर्टिकल अर्थात ठाडो हुन्छ ।

यो टिभीको सबैभन्दा महत्वपूर्ण विशेषता नै के छ भने यसलाई एउटा मोबाइल जस्तै घुमाएर समेत हेर्न सकिन्छ । यो टिभीलाई ३६० डिग्रीमा घुमाउन सकिन्छ ।

जसका लागि एउटा विशेष किसिमको स्ट्याण्ड दिइएको छ । सेरो विश्वकै पहिलो मोबाइल अप्टिमाइज्ड टिभी हो, जसको स्क्रिन ९० डिग्री भर्टिकल (ठाडो) देखि होरिजेन्टल (तेर्छो) मोड्न सकिन्छ ।

टिभीको स्क्रिन घुमाउनका लागि एउटा बटन दिइएको छ । यसको अर्थ सेरो स्मार्ट टिभीमा भर्टिकल तथा होरिजेन्टल मोडमा भिडियोहरु हेर्न सकिन्छ ।

सामसङका अनुसार यो डिजाइन टिभीमा वेब सर्फिङ तथा सोसल मिडिया प्लेटफर्मका लागि पर्फेक्ट छ । भारतीय बजारमा यो टिभीको मूल्य करिब दुई लाख रुपैयाँ रहेको छ ।

यसमा ४.१ च्यानल स्पिकर सिस्टम तथा ६० वाटको साउन्ड आटपुट रहेको छ । यसमा अन्य कयौं स्मार्ट फिचर समेत रहेका छन् । यो टिभीले एक अर्बभन्दा बढी रंग तथा शेडका साथ शत प्रतिशत कलर भ्वालुम डेलिभर गर्नसक्ने कम्पनीको दाबी छ ।

यसलाई मूख्यतः युवा पुस्ताका प्रयोगकर्तालाई लक्षित गर्दै डिजाइन गरिएको हो । जसले कन्टेन्टलाई मोबाइलमा जस्तै ठाडो रुपमा हेर्न रुचाउँछन् । ठाडो रुपमा हेर्दा यो टिभी स्मार्टफोन जस्तै प्रतित हुन्छ ।

यो भर्टिकल टिभीमा फोनमा जस्तै फोटो तथा भिडियो हेर्दाको अनुभव प्राप्त हुन्छ । सेरोले कन्टेन्टलाई फोरके रेजोलुसनमा बदल्नका लागि एआई प्रविधि समेत प्रयोग गर्दछ ।

यो टिभी १० वर्षको ‘नो स्क्रिन बर्न इन’ वारेन्टी, एक सालको वारेन्टी र प्यानलमा थप एक वर्षको वारेन्टीका साथ खरिद गर्न सकिनेछ । यसमा फेसबुक, इन्स्टाग्राम जस्ता सोसल मिडिया साइट गज्जबसँगले देख्न सकिन्छ ।

यो टिभीमा फोनमा जस्तै कन्टेन्टलाई ठाडो रुपमा स्क्रोलिङ गर्न सकिन्छ । सेरोमा एडप्टिभ पिक्चर, रेस्पोन्सिभ यूआई, ट्याप भ्यू प्रविधि, एक्टिभ भ्वाइस एम्प्लिफायर (एभीए) जस्ता अन्य स्मार्ट फिचर समेत समावेश छन् ।

एजेन्सीको सहयोगमा ।

पछिल्लो अध्यावधिक: असोज २, २०७९ २२:३०

टिप्पणीहरू