च्याटजीपीटीको बग पत्ता लगाउनेलाई २६ लाखसम्म पुरस्कार दिँदै ओपन एआई
चैत २९, २०७९ १६:३५
काठमाडौं । अहिलेको चर्चित एआई टुल च्याटजीपीटीको सुरक्षा कमजोरी (बग) पत्ता लगाउने व्यक्तिलाई ओपनएआईले सम्मान गर्ने भएको छ ।
‘बग बाउन्टी प्रोग्राम’ घाेषणा गर्दै ओपनएआईले च्याटजीपीटीभित्र रहेका कमजाेरी रिपाेर्ट गर्न आह्वान गरेकाे छ । प्लेटफर्ममा भएका कमजोरी वा त्रुटि पत्ता लगाउन कम्पनीले बगक्राउडसँगको साझेदारीमा सो कार्यक्रमको घोषणा गरेको हो ।
एक ब्लग पोष्ट लेख्दै बग पत्ता लगाउनेलाई संवेदशिलताको आधारमा कम्पनीले २०० डलरदेखि २० हजार डलरसम्म (करिब २६ हजारदेखि २६ लाख रुपैयाँसम्म)को पुरस्कार दिने घाेषणा गरेकाे छ ।
गत महिना एउटा बगका कारण ओपनएआईले च्याटबटलाई केही समयका लागि बन्द गरेको थियो । यसकारण प्लेटफर्ममा थप बग हुनसक्ने र तिनको समाधान नगरे ठूलो दुर्घटना हुनसक्ने भएकाले सो कार्यक्रम गर्न लागेको कम्पनीले जनाएको छ ।
यसका लागि ओपनएआईले विश्वभर रहेका सेक्युरिटी अनुसन्धानदाता, इथिकल ह्याकर र प्रविधिमा रुचि राख्ने जो कोहीलाई यस कार्यक्रममा सहभागी हुन आह्वान गरेको छ । यदि तपाईं पनि बग बाउन्टीमा रुचि राख्नुहुन्छ भने यहाँ क्लिक गरी उक्त कार्यक्रममा सहभागी जनाउन सक्नुहुन्छ ।
पछिल्लो अध्यावधिक: चैत २९, २०७९ १७:३१
