संशोधन भयो यातायत व्यवस्थापन कार्यविधि, अब नेपालमा बनेका सवारी पनि दर्ता हुने

काठमाडौं । अब नेपालमा उत्पादित सवारी साधनको पनि दर्ता हुने भएको छ । यातायात व्यवस्था विभागले यातायात व्यवस्थापन कार्यविधि निर्देशिका २०६० मा संशोधन गर्दै नेपालमा जडान वा उत्पादन हुने सवारी दर्ता सम्बन्धी विशेष व्यवस्था गरेको हो ।

विभागले एक सूचना गर्दै कार्यविधि निर्देशिकामा नयाँ बुँदा  ‘११.१.९’ थप गरेको जानकारी दिएकाे छ ।

साे बुँदामा लेखिएको छ, ''यस निर्देशिकामा अन्यत्र जुनसुकै कुरा लेखिएको भएपनि विदेशबाट पार्टपूर्जा पैठारी गरी नेपालमा जडान हुने वा नेपालमा नै उत्पादन हुने सवारीको नयाँ दर्ता, सरुवा दर्ता, हेरफेर दर्ता, लिलाम दर्ता, पुनः दर्ता र नामसारी लगायतका प्रयोजनका लागि त्यस्तो सवारीको भन्सार प्रज्ञापनपत्र आवश्यक पर्ने छैन ।''

 त्यस्तै नेपालमा जडान हुने वा उत्पादन हुने सवारीको नयाँ दर्ता, सरुवा दर्ता, हेरफेर दर्ता, लिलाम दर्ता, पुनः दर्ता र नामसारी लगायतका कार्यका लागि जडानकर्ता वा उत्पादक कम्पनीले भन्सार प्रज्ञापनपत्रको सट्टा मूल्य अभिवृद्धि कर विजक र प्रचलित कानून बमोजिम अन्तः शुल्क सम्बन्धी प्रावधान आकर्षित हुने सवारीको हकमा अन्तः शुल्क निकासी फारम समेत पेश गर्नुपर्ने उल्लेख गरिएको छ ।  

विद्युतीय बाइक निर्माण कम्पनी यात्री मोटरसाइकल्सले बिक्री गरेको बाइक दर्ता नभई नम्बर प्लेट नपाउने समस्या आएपछि नेपालमा नै बनेको सवारी दर्ताको विषयलाई लिएर धेरै आलोचना भएको थियो ।

यात्रीका बाइक दर्ता नभएपछि कम्पनीले विगत आठ महिनादेखि उत्पादन बन्द गरेकाे थियाे । गत आइतबार प्रधानमन्त्री पुष्पकमल दाहाल 'प्रचण्ड'ले मुख्य सचिवमार्फत यात्रीलगायतका स्वदेशी सवारी साधन दर्ता गर्ने सन्दर्भमा रहेको विद्यमान समस्या समाधान गर्न कानून तर्जुमाको प्रक्रिया अगाडि बढाउन निर्देशन दिएका थिए ।

पछिल्लो अध्यावधिक: बैशाख १४, २०८० १३:१३

टिप्पणीहरू