बागलुङको विकट बस्ती रायडाँडामा टेलिकमको मोबाइल सेवा
जेठ २०, २०८० ९:५४
बागलुङ । बागलुङ नगरपालिका वडा नं. ११ स्थित रायडाँडामा नेपाल टेलिमको मोबाइल सेवा पुगेको छ । टेलिकमले बीटीएस टावर निर्माण गरी यो क्षेत्रमा सेवा सञ्चालनमा ल्याएको हाे । योसँगै टेलिकमको नेटवर्कमार्फत कुराकानी गर्न डाँडाकाँडा धाउनुपर्ने बाध्यता हटेको छ ।
सेवा सञ्चालनमा आएपछि स्थानीय बासिन्दाले गुणस्तरीय भ्वाइस र डेटा सेवा पाएको नेपाल टेलिकम बागलुङका प्रमुख केशव शर्माले बताए । टावर सञ्चालनमा आएपछि यहाँका झण्डै ३०० घरधुरीमा मोबाइलको भ्वाइस र डेटा दुवै सेवा सहज भएको उनको भनाइ छ ।
रायडाँडा, भेडिखोर, बालौटे, राम्तोला लगायतका बस्ती टेलिकमको मोवाइल सेवाबाट प्रत्यक्ष लाभान्वित भएका हुन् ।
''पहिलेदेखि नै मोबाइल सेवाका लागि टेलिकमसँग माग गरिरहेका थियौँ, अहिले टावर बनेर सेवा सुरु भइसक्यो, हामी स्थानीय खुशी छौँ,'' स्थानीय फर्स बहादुर थापा मगरले भने ।
मोबाइलमा इन्टरनेटको लागि तत्काललाई थ्रीजी सेवा उपलब्ध गराइएकाे छ । उक्त टावरमा छिट्टै चौंथो पुस्ताको फोरजी सेवा उपलब्ध गराउने टेलिकमको योजना छ ।
बागलुङ नगरपालिका वडा नं ११ का वडा अध्यक्ष ज्ञानेन्द्र गौतमले मोबाइल सेवाले स्थानीयबासीको दैनिकी सहज बनेको बताए ।
पछिल्लो अध्यावधिक: जेठ २०, २०८० ९:५५
