२०२३ मा प्रविधि कम्पनीहरूबाट निकालिए साढे दुई लाख कर्मचारी
मंसिर ३०, २०८० १४:५१
काठमाडौं । विश्वभरका प्रविधि कम्पनीहरूले २०२३ मा मात्रै साढे दुई लाख बढीलाई कामबाट निकालेको तथ्य बाहिरिएको छ । आर्थिक मन्दीलाई मुख्य कारण देखाउँदै प्रविधि कम्पनीहरूले दुई लाख ५८ हजार बढी कर्मचारी कटौती गरेको पाइएकाे हाे ।
कर्मचारी कटाैतीकाे तथ्यांक राख्ने संस्था लेअफ्सले याे तथ्य सार्वजनिक गरेकाे हाे । यो सङ्ख्या गत वर्ष (२०२२)को तुलनामा ५० प्रतिशतले बढी भएको बताइएको छ । प्रत्येक महिनाको डेटा ट्र्याक गरेर यो सङ्ख्या निकालिएको हाे ।
अल्फाबेट (गुगल), अमेजन, माइक्रोसफ्ट, याहु, मेटा, जुम लगायतका प्रविधि कम्पनीहरूले वर्षको सुरुवातमा नै कर्मचारी कटौती गर्न थालेका थिए, जुन ठूला कम्पनीमा मात्र सीमित भएन । धेरै स्टार्टअप, साना तथा मझौला आकारका कम्पनीहरू पनि त्यसमा मिसिए ।
कतिपय अर्थशास्त्रीहरूले मन्दी नहुने दाबी गरिरहँदा प्रविधि कम्पनीहरूले कर्मचारी कटाैतीकाे मुख्य कारण अर्थसंकटलाई नै मानेका छन् ।
यसैबीच टेक क्रन्चले पनि कर्मचारी कटौतीको महिनागत तथ्याङ्क सार्वजनिक गरेकाे छ, जसमा सबैभन्दा बढी जनवरी महिनामा प्रविधि कम्पनीहरूले कर्मचारी निकालेका छन्:
-जनवरी: ८९,५५४
-फेब्रुअरी: ४०, ०२१
-मार्च: ३७, ८२३
-अप्रिल: २०,०१४
-मे: १४,९२८
-जुन: १०,९५८
-जुलाई: १०,५८९
-अगस्ट: ९,५४५
-सेप्टेम्बर: ४,६३२
-अक्टोबर: ७,३३१
-नोभेम्बर: ६,९५६
यी ११ महिनामा कुन कम्पनीले कति कर्मचारीलाई कामबाट निकाले भने हेर्न यहाँ क्लिक गर्नुहाेस् ।
पछिल्लो अध्यावधिक: मंसिर ३०, २०८० १५:९
