डिजिटल अधिकार र सुरक्षा सम्बन्धी हाते पुस्तिका सार्वजनिक, यसरी गर्नुहोस् डाउनलोड

काठमाडौं । डिजिटल अधिकार तथा सुरक्षाका विषयमा नागरिकलाई सशक्तीकरण गर्ने उद्देश्यका साथ डिजिटल राइट्स नेपालले ‘डिजिटल अधिकार र सुरक्षा’  सम्बन्धी हाते पुस्तिका सार्वजनिक गरेको छ ।

नागरिक, शिक्षक-शिक्षिका, नीति निर्माता तथा अभियन्ताहरूलाई अनलाइन स्पेसमा रहेका सुरक्षासम्बन्धी चुनौती वा जटिलताहरूलाई बुझाउने र सुरक्षित तवरले डिजिटल टेक्नोलोजीहरूको प्रयोग गर्न आवश्यक सीप र उपयुक्त उपकरणहरूको बारे सचेतना फैलाउने लक्ष्यका साथ पुस्तक तयार पारिएको हो । 

डिजिटल अन्तरक्रिया दैनिक जीवनको अभिन्न अङ्ग बन्दै गएसँगै डिजिटल अधिकारको बुझाई र संरक्षणको महत्त्व पनि बढेको छ । यसैलाई मध्यनजर गर्दै हाते पुस्तिकामा अनलाइन अभिव्यक्तिको स्वतन्त्रता, गोपनीयता, तथ्याङ्क संरक्षण, सूचनामा पहुँच, इन्टरनेट शासन तथा साइबर सुरक्षा लगायतका विषयहरू समावेश गरिएका छन् ।

साथै पुस्तिकाले डिजिटल साक्षरता बढाउन र अनलाइन स्पेसलाई सुरक्षित बनाउनका लागि व्यावहारिक मार्गदर्शन र उपयोगी सुझावहरू समेत प्रदान गर्ने डिजिटल राइट्स नेपालले जनाएको छ ।

“यो हाते पुस्तिका डिजिटल साक्षरता अभिवृद्धि गर्ने र सुरक्षित अनलाइन वातावरणलाई प्रवर्द्धन गर्ने एक उपयोगी औजार हो,” डिजिटल राइट्स नेपालका कार्यकारी निर्देशक सन्तोष सिग्देलले भने । 

डिजिटल राइट्स नेपाल नेपालमा डिजिटल अधिकारको संरक्षण र प्रवर्द्धनमा समर्पित एक गैरनाफामुखी पहल हो । यस संस्थाले अनलाइन अभिव्यक्तिको स्वतन्त्रता, अनलाइन गोपनीयता, सूचनामा पहुँच, इन्टरनेट शासन, साइबर कानुन र नीतिहरू, र साइबर सुरक्षा जस्ता महत्त्वपूर्ण मुद्दाहरूमा केन्द्रित रही काम गर्दै आइरहेको छ ।

‘डिजिटल अधिकार र सुरक्षा’ सम्बन्धी हाते पुस्तिका सुसूचित र सुरक्षित डिजिटल समाजलाई बढावा दिने एउटा महत्त्वपूर्ण कदम हुने बताइएको छ । यस पुस्तिका अनलाइनमा रहेका आफ्ना अधिकारहरू बुझ्न र सुरक्षित गर्न खोज्नेहरूका लागि महत्त्वपूर्ण स्रोतको रूपमा रहने अपेक्षा गरिएको छ ।

यसरी गर्नुहोस् डाउनलोड

पछिल्लो अध्यावधिक: असार ३०, २०८१ १३:४२

टिप्पणीहरू