सिंगापुरको बैंकमा पैसा जम्मा गरेको भेटिएपछि सुनिल पौडेल विरुद्द अर्को मुद्दा दायर
साउन ३, २०८१ १०:१०
काठमाडौं । राजस्व अनुसन्धान विभागले नेपाल टेलिकमका तत्कालीन प्रबन्ध निर्देशक एवं राष्ट्रिय सूचना प्रविधि केन्द्रका पूर्व कार्यकारी निर्देशक सुनिल पौडेलविरुद्ध विदेशी विनिमय ऐन उल्लंघन गरेको आरोपमा बुधवार काठमाडौं जिल्ला अदालतमा मुद्दा दायर गरेको छ ।
विभागले पौडेलले नियम विपरीत सिंगापुरको युनाइटेड ओभरसिज बैंकमा ५८ हजार अमेरिकी डलर अर्थात् ७७ लाख ४५ हजार ९०० नेपाली रुपैयाँ जम्मा गरेको आरोप लगाएको छ ।
नेपाल राष्ट्र बैंकको स्वीकृति बिना नै विदेशमा खाता खोलेर विदेशी विनिमय ऐनको व्यवस्था उल्लंघन गरेको ठहर गर्दै मुद्दा दायर गरिएको विभागले जनाएको छ ।
सोही ऐनको दफा १७ (१) अनुसार बिगोको तेब्बर अर्थात् दुई करोड बत्तीस लाख सैँतीस हजार सात सय रुपैयाँ जरिवाना मागदावी गरिएको छ । यसअघि पनि पौडेलविरुद्ध अख्तियारले विभिन्न भ्रष्टाचार प्रकरणमा विशेष अदालतमा मुद्दा दायर गरिसकेको छ ।
पछिल्लो अध्यावधिक: साउन ३, २०८१ ११:९
