नागरिक एपबाट सरकारी सेवा व्यवहारिक र प्रभावकारी बनाउन सकिन्छः प्रधानमन्त्री ओली

काठमाडौं । प्रधानमन्त्री केपी शर्मा ओलीले नागरिक एपका माध्यमबाट सेवा व्यवहारिक र प्रभावकारी बनाउन सकिने बताएका छन् । मङ्गलबार प्रधानमन्त्री कार्यालय, सिंहदरबारमा सचिवहरूलाई निर्देशन दिंदै प्रधानमन्त्री ओलीले नागरिकका लागि सेवा सहज र प्रभावकारी बनाउन नागरिक एप उपयुक्त हुने बताए ।

“नागरिक एपका माध्यमबाट पनि सेवा व्यवहारिक र प्रभावकारी बनाउन सकिन्छ,” ओलीले भने, “त्यसैले कुनै पनि नागरिकलाई लाइन नगरी सहज रूपमा सेवा दिइनुपर्छ । दुःखी गरिबलाई मान्छे नै नगन्ने प्रवृत्ति राख्नु हुँदैन । यसमा सम्बन्धित मन्त्रालय र निकायको ध्यानाकर्षण गराउँछु ।”

त्यस्तै सवारीसाधन दर्ता, राहदानी, नागरिकता, सवारी चालक अनुमति पत्र, राष्ट्रिय परिचयपत्र लगायत सेवा लिने ठाउँमा लाइन लाग्नुपर्ने बाध्यतालाई कम गर्दै लैजानु पर्नेमा उनले जोड दिए ।

उनले भने, “उभिन नसक्ने ज्येष्ठ नागरिक पनि लाइन लाग्नुपर्ने स्थिति दुःखद हो । यो ललितपुरकै एक कार्यालयको घटना हो । मैले प्रत्यक्ष नदेखे पनि सुनेको हुँ । सरकारबाट जनता निराश हुनुपर्ने यस्तो खालको रवैया अन्त्य हुनुपर्छ । कर्मचारी सेवा गर्न बसेको हो, शासन गर्न बसेको होइन, हामीले जनतासँग नरम व्यवहार गरेर सेवा दिनुपर्छ ।”

पछिल्लो अध्यावधिक: साउन १७, २०८१ ११:११

टिप्पणीहरू