भुटानी क्लब विरुद्ध खेल्दै नेपालको लिग च्याम्पियन चर्च ब्वाइज, कसरी हेर्ने लाइभ ?
साउन २९, २०८१ १६:५६
काठमाडौं । एएफसी च्यालेन्ज लिग छनोट अन्तर्गत आज हुने नेपालको चर्च ब्वाइज युनाइटेड र भुटानको पारो फुटबल क्लबबीचको प्रत्यक्ष प्रसारण डिश मिडिया नेटवर्कको एक्सन स्पोर्टस् एचडी र हाम्रो खेलकुदको युट्युब च्यानलबाट हेर्न सकिने भएको छ ।
सहिद स्मारक ए डिभिजन लिग विजेताका रूपमा चर्च ब्वाइज एफसी च्यालेन्ज लिगमा छनाेट भएको हो । यो खेल साँझ ६ः०० बजेदेखि दशरथ रंगशालामा सुरु हुनेछ ।
चर्च ब्वाइज युनाइटेडले यस खेलका लागि राष्ट्रिय टोलीका खेलाडीहरू लकेन लिम्बु, सनिश श्रेष्ठ, आयुष घलानसहित केही विदेशी खेलाडीहरूलाई टिममा समावेश गरेको छ । पारो एफसीले पनि टिमलाई मजबुत बनाउँदै जापानका पूर्व स्टार केइसुके होन्डालाई टिममा समावेश गरेको छ ।
रंगशालामा खेल हेर्न खल्ती वालेटबाट टिकट खरिद गर्न सकिने छ । यसअन्तर्गत भीआइपीतर्फ ५०० र साधारणतर्फ २०० रुपैयाँ टिकट तोकिएको छ ।
पछिल्लो अध्यावधिक: साउन २९, २०८१ १७:४
