मर्जरमा जानेभएपछि नेपाल सुपर लिगको टिकेटिङमा खल्ती र आईएमई पेको साझेदारी

काठमाडौं । आपसमा मर्जर हुने सम्झौता गरेका नेपालका दुई डिजिटल वालेट कम्पनीले व्यावसायिक साझेदारी सुरु गरेका छन् । खल्ती र आईएमई पेले आसन्न नेपाल सुपर लिग २०२५ को टिकेटिङ पार्टनरका लागि साझेदारी गरेका हुन् ।

यही १६ चैत्रदेखि १३ वैशाखसम्म दशरथ रंगशालामा हुने नेपाल सुपर लिगको तेस्रो संस्करणमा खल्ती र आइएमई पे एकसाथ टिकटिङ पार्टनरको रूपमा आबद्ध भएका छन् । फुटबल फ्यानहरूले खल्ती एप वा आइएमई पे मध्ये जुनसुकै माध्यमबाट पनि लिगको टिकेट काट्न सक्नेछन् ।

नेपाल सुपर लिगका यो भन्दा अघिल्ला संस्करणहरूमा ‘आइएमई पे’ र नेपाल प्रिमियर लिग, अर्जुन ट्रफी, इन्टरनेसनल वुमन्स च्याम्पियनशिप जस्ता खेलकुद लिगमा ‘खल्ती’ टिकटिङको पार्टनरको रूपमा रहँदै आएका  थिए । दुवै डिजिटल वालेटको यस संयुक्त टिकटिङ साझेदारीले नयाँ ऊर्जा थप्ने आशा उनीहरूले व्यक्त गरेका छन् ।

यस लिगमा ललितपुर सिटी, काठमाडौं रेजर्स, बुटवल लुम्बिनी, झापा, चितवन, पोखरा थन्डर, धनगढी गरी ७ फुटबल क्लब भिड्दैछन् । नेपालका दुई डिजिटल भुक्तानी प्लेटफर्म, खल्ती र आईएमई पेसँग साझेदारी गर्न पाउँदा आफूहरू अत्यन्तै उत्साहित रहेको नेपाल सुपर लिग (एनएसएल) का प्रबन्ध निर्देशक श्रेयान्स कार्कीले बताए । यो साझेदारीले टिकटिङलाई सरल बनाउने र दर्शकहरूले सहज रूपमा आफ्नो सिट सुरक्षित गर्न सक्ने आशा उनले व्यक्त गरे । "हाम्रो लक्ष्य एनएसएलको अनुभवलाई अझ सरल,  इन्टरेक्टिभ र सहज पहुँच योग्य बनाउनु हो,” कार्कीले भने ।

आइएमई पेका कार्यकारी अधिकृत प्रविन रेग्मीले खल्ती र एनएसएलसँग सहकार्य गर्दै नेपाली फुटबलको विकासमा योगदान र खेलप्रेमीहरूको अनुभवलाई डिजिटल सोलुसनद्वारा थप सहज बनाउने लक्ष्य राखिएको बताए । त्यसैगरी खल्तीका प्रमुख कार्यकारी अधिकृत विनय खड्काले स्वयँ खेलप्रेमीको रूपमा, दर्शकहरूलाई अनलाइन प्लेटफर्म मार्फत सजिलै आफ्नो सिट सुरक्षित गर्ने सुविधा प्रदान गर्ने अवसर पाएको भन्दै खुसी व्यक्त गरे ।

खल्ती र आईएमई पेबिच यसअघि नै मर्जरमा जाने गरी निर्णय लिइसकेका छन् । त्यसैको पृष्ठभूमिमा दुवै वालेटबिच टिकेटिङमा यो व्यावसायिक साझेदारी अघि बढेको हो ।

पछिल्लो अध्यावधिक: चैत १४, २०८१ १०:५४

टिप्पणीहरू