गुगलमा तपाईँको व्यक्तिगत जानकारी देखियो ? अब सजिलै हटाउन सकिने

काठमाडौं । गुगलले आफ्ना प्रयोगकर्तालाई व्यक्तिगत जानकारी हटाउन सजिलो प्रक्रिया उपलब्ध गराएको छ । अब प्रयोगकर्ताले फोन नम्बर, ठेगाना वा ईमेल जस्ता व्यक्तिगत विवरण गुगल सर्चमा देखिएमा सीधा सर्चबाटै हटाउन अनुरोध गर्न सक्नेछन् ।

गुगलले केही वर्षअघि ‘Results About You’ टुल सार्वजनिक गरेको थियो । यसले प्रयोगकर्तालाई आफ्नो व्यक्तिगत जानकारी अनलाइन ट्र्याक गर्न र आवश्यक परेमा हटाउन अनुमति दिन्थ्यो । तर, यो टुल सेटिङ्सको भित्र लुकेको हुँदा धेरै प्रयोगकर्ताले सजिलै फेला पार्न नसकेको गुनासो गरेका थिए ।

नयाँ फिचरअनुसार प्रयोगकर्ताले गुगल सर्चबाटै आफ्नो जानकारी हटाउन अनुरोध गर्न सक्नेछन् ।

कस्तो छ प्रक्रिया ?

-गुगल सर्चमा आफ्नो व्यक्तिगत जानकारी खोज्ने– जस्तै; आफ्नो फोन नम्बर खोज्दा विभिन्न वेबसाइटहरूमा रहेको विवरण देखिन सक्छ ।
 

-यसपछि थ्री डट (…) मा क्लिक गर्ने– सम्बन्धित रिजल्ट देखिएपछि पेजको छेउमा रहेको थ्री डट (…) मा क्लिक गर्नुहोस् ।
 

‘Remove result’ बटन क्लिक गर्ने– यो बटनमा क्लिक गरेपछि हटाउनु कारण छान्ने विकल्प देखिन्छ ।
 

‘It shows my personal info and I don't want it there’ अप्सन छनोट गर्नुहोस् । यो अप्सन छानेपछि ‍गरेपछि गुगलले रिभ्यु गर्छ । यदि तपाईँको अनुरोध गुगलको नीति अनुरूप भए उक्त जानकारी हट्नेछ ।

गुगलले जानकारी हटाउने अनुरोध स्वीकृत गरेपछि केही मिनेटमै ती विवरण सर्च रिजल्टबाट हट्न सक्छन् । अर्को कुरा, गुगलले नतिजाबाट हटाए पनि स्रोत वेबसाइटमा जानकारी रहन सक्छन् । यसका लागि प्रयोगकर्ताले वेबसाइट म्यानेजरसँग सम्पर्क गर्नुपर्ने हुन्छ ।

गुगलले व्यक्तिगत जानकारी मात्र नभइ गैरकानुनी वा आपत्तिजनक सामग्री हटाउने सुविधा पनि उपलब्ध गराएको छ । प्रयोगकर्ताले तीन डट (…) मेनुमा गएर निम्न विषयमा हटाउने अनुरोध गर्न सक्छन्:

• फिसिङ (Phishing) साइटहरू
   

• हिंसात्मक सामग्री
   

• अश्लील वा आपत्तिजनक सामग्री
   

• पुरानो वा अपडेट नभएको जानकारी

यसका साथै गुगलले ‘Results About You’ टुलमा निगरानी सुविधा थपेको छ । प्रयोगकर्ताले गुगल अकाउन्टमार्फत साइन इन गरेर आफ्ना व्यक्तिगत जानकारी कहाँ देखिएको छ भन्ने जानकारी प्राप्त गर्न सक्नेछन् ।

स्रोत: जेडडी नेट

पछिल्लो अध्यावधिक: चैत १८, २०८१ १४:०

टिप्पणीहरू