ट्रम्प नीतिले एप्पललाई झट्का: मूल्यवान कम्पनीको ताज खोसियो, आईफोन महँगिने संकेत

काठमाडौँ । प्रविधि कम्पनी एप्पल अब विश्वकै सबैभन्दा मूल्यवान कम्पनी रहेन । सीएनबीसी रिपोर्ट अनुसार लगातार चार दिनको तीव्र शेयर मूल्य गिरावटपछि एप्पलको स्थान माइक्रोसफ्टले ओगटेको छ ।

मंगलबार बजार बन्द हुँदासम्म माइक्रोसफ्टको बजार मूल्यांकन २.६४ ट्रिलियन डलर पुगेको छ भने एप्पलको मूल्यांकन २.५९ ट्रिलियन डलरमा झरेको छ । केही दिनअघिसम्म एप्पल, माइक्रोसफ्ट र चिप निर्माता एनभिदिया सबैको मूल्यांकन ३ ट्रिलियन डलरभन्दा माथि रहेको थियो ।

विश्वव्यापी शेयर बजारमा देखिएको यो गिरावट अमेरिकाका राष्ट्रपति डोनल्ड ट्रम्पले १०० भन्दा बढी देशहरूबाट आउने आयातमा नयाँ ट्यारिफ लगाउने घोषणा गरेपछि आएको हो । यस असरले सबै कम्पनीलाई छोएपनि विशेष रूपमा एप्पल प्रभावित भएको देखिन्छ । किनभने यसको उत्पादन चीनमा धेरै निर्भर छ ।

नासडाक सूचकांक पछिल्ला चार ट्रेडिङ दिनमा १३ प्रतिशतसम्म घटिसकेको छ । सम्भावित मन्दी र बढ्दो उपभोक्ता मूल्यको चिन्ताले लगानीकर्ताहरूलाई त्रसित बनाएको विश्लेषण गरिएको छ । 

यदि ट्रम्पको नयाँ शुल्क पूर्ण रूपमा उपभोक्तामा थोपरिए अमेरिकाभित्र आईफोन १६ प्रो म्याक्सको मूल्य ३५० डलरसम्म बढ्ने यूबीएसका विश्लेषकहरू अनुमान गरेका छन् ।

यसैबिच द वाल स्ट्रिट जर्नलको रिपोर्ट अनुसार एप्पलले आफ्ना केही आईफोन उत्पादन कार्यहरू चीनबाट भारत स्थानान्तरण गर्ने तयारी गरिरहेको छ । ट्रम्पले अमेरिकामा उत्पादनलाई पुनर्जीवित गर्न जोड दिएपनि विश्लेषक र आपूर्तिकर्ताहरूले आईफोन उत्पादन अमेरिकामा सार्नु अव्यवहारिक हुने चेतावनी दिएका छन् । 

यसैबिच, सम्भावित मूल्यवृद्धिको आशंकाले अमेरिकाका एप्पल स्टोरहरूमा आईफोन खरिद गर्ने ग्राहकहरूको चाप बढेको जनाइएको छ । ग्राहकहरू मूल्य बढ्नुअघि नै नयाँ आईफोन किन्न हतारमा देखिएको सीएनबीसीले उल्लेख गरेको छ ।

पछिल्लो अध्यावधिक: चैत २८, २०८१ ९:२२

टिप्पणीहरू