च्याटजीपीटीमा एडल्ट कन्टेन्ट दिने तयारी स्वरूप ओपनएआईले ल्यायो 'एज प्रेडिक्सन' फिचर

काठमाडौँ । आर्टिफिसियल इन्टेलिजेन्स कम्पनी ओपनएआईले विश्वभरका च्याटजीपीटी प्रयोगकर्ताका लागि एज प्रेडिक्सन (उमेर अनुमान) गर्ने नयाँ फिचर सार्वजनिक गरेको छ । यो कदमलाई लोकप्रिय च्याटबटमा वयस्क सामग्री (एडल्ट कन्टेन्ट) लाई अनुमति दिने तयारीको रूपमा हेरिएको छ ।

नयाँ प्रणालीले केवल प्रयोगकर्ताले भनेको उमेरमा मात्र भर नपरी आर्टिफिसियल इन्टेलिजेन्सको प्रयोग गरेर कुनै पनि अकाउन्ट नाबालकको हो वा होइन भन्ने कुराको निर्धारण गर्नेछ । यसका लागि एआई मोडेलले प्रयोगकर्ताको व्यवहार र अकाउन्टको गतिविधि सूक्ष्म रूपमा विश्लेषण गर्दछ । यसमा अकाउन्ट कहिले खोलिएको हो, प्रयोगकर्ता कुन समयमा बढी सक्रिय रहन्छन् र उनीहरूको प्रयोग गर्ने तरिका कस्तो छ भन्ने जस्ता सङ्केतहरूलाई आधार मानिनेछ ।

यदि एआई मोडेलले कुनै अकाउन्ट १८ वर्षभन्दा कम उमेरको व्यक्तिको भएको अनुमान गरेमा च्याटजीपीटीले स्वचालित रूपमा थप सुरक्षाका उपायहरू अपनाउनेछ । यसले किशोरकिशोरीहरूलाई हिंसात्मक दृश्य, यौनजन्य वा रोमान्टिक भूमिका (रोल प्ले), आत्म-हानि (self-harm) प्रोत्साहन गर्ने सामग्री र अस्वस्थ खानपान वा शरीरको बनावटसँग सम्बन्धित हानिकारक सामग्रीहरूबाट टाढा राख्न मद्दत गर्नेछ । उमेरको बारेमा स्पष्ट जानकारी नभएको अवस्थामा प्रणालीले सुरक्षित अनुभवलाई नै प्राथमिकता दिने कम्पनीले जनाएको छ ।

यसका साथै अभिभावकहरूका लागि 'प्यारेन्टल कन्ट्रोल' को सुविधा पनि दिइएको छ । जसबाट उनीहरूले च्याटजीपीटी प्रयोग गर्ने समय तोक्न र एआईको तालिम प्रक्रियालाई नियन्त्रण गर्न सक्नेछन् ।

यदि कुनै वयस्क प्रयोगकर्तालाई एआईले झुक्किएर १८ वर्ष मुनिको समूहमा राखेमा उनीहरूले Persona नामक सुरक्षित पहिचान प्रमाणीकरण सेवा मार्फत आफ्नो 'सेल्फी' खिचेर पुनः पूर्ण पहुँच प्राप्त गर्न सक्नेछन् । प्रयोगकर्ताले च्याटजीपीटीको सेटिङमा गएर उमेरसम्बन्धी सुरक्षा लागु भएको छ वा छैन भन्ने जानकारी पनि लिन सक्नेछन् । यो फिचर आगामी हप्ताहरूमा युरोपेली सङ्घ (ईयू) का देशहरूमा पनि विस्तार गरिनेछ ।

ओपनएआईका एप्लिकेसन प्रमुख फिजी सिमोका अनुसार सन् २०२६ को पहिलो त्रैमासिकसम्ममा च्याटजीपीटीमा आधिकारिक रूपमा एडल्ट मोड सुरु हुने अपेक्षा गरिएको छ । यसअघि कम्पनीका प्रमुख कार्यकारी अधिकृत साम अल्टम्यानले पनि उमेर प्रमाणित गर्ने प्रयोगकर्ताहरूका लागि परिपक्व सामग्री (मच्योर कन्टेन्ट) उपलब्ध गराउने सङ्केत गरेका थिए ।

हाल च्याटजीपीटीमा ८० करोड साप्ताहिक सक्रिय प्रयोगकर्ता रहेका छन् । कम्पनीले आफ्नो आम्दानी बढाउने प्रयासस्वरूप हालै अमेरिकाका केही प्रयोगकर्ताहरूलाई च्याटबट भित्रै विज्ञापनहरू देखाउन सुरु गर्ने घोषणा समेत गरिसकेको छ । यसरी उमेर पहिचान प्रणाली लागु गर्नुलाई ओपनएआईको व्यापारिक विस्तार र प्रयोगकर्ता सुरक्षाबिचको सन्तुलन मिलाउने प्रयासको रूपमा हेरिएको छ ।

पछिल्लो अध्यावधिक: माघ ८, २०८२ १९:३१

टिप्पणीहरू