सामाजिक सञ्जालमा भ्रामक सामग्री पोस्ट वा शेयर नगर्न प्रहरीको चेतावनी

माघ २४, २०८२ १०:४०

काठमाडौँ । नेपाल प्रहरीले सामाजिक सञ्जालको प्रयोग गर्दा विशेष सावधानी अपनाउन नागरिकलाई आग्रह गरेको छ । शुक्रबार एक सूचना जारी गर्दै प्रहरीले अनलाइन माध्यमको दुरुपयोग गरी भ्रामक र सद्भाव बिथोल्ने सामग्री सम्प्रेषण नगर्न सचेत गराएको हो ।

“सामाजिक सञ्जाल र विभिन्न अनलाइन माध्यमको प्रयोगद्वारा गलत सूचना र भ्रम फैलाउने, जातीय, धार्मिक, सामाजिक र साम्प्रदायिक स‌द्भाव बिगार्ने, अरूको चरित्रहत्या गर्ने तथा शान्ति सुरक्षामा असर पार्ने सामाग्री बनाउने र शेयर गर्नु अपराध हो,” प्रहरीले सूचनामा भनेको छ । यस्तै कसैको चरित्रहत्या गर्ने तथा शान्ति सुरक्षामा खलल पुर्‍याउने खालका सामग्री बनाउने र शेयर नगर्न प्रहरीले चेतावनी दिएको छ ।

सूचनामा अगाडि भनिएको छ, “कुनै पनि घटना, कसैको अभिव्यक्ति, तस्बिर वा भिडिओलाई झुटो, गलत वा भ्रमपूर्ण रूपमा काँटछाँट गरेर अफवाह फैलाउने उद्देश्यले प्रयोग नगर्न र त्यस्ता सामग्रीलाई प्रोत्साहन मिल्ने गरी लाइक, शेयर वा कमेन्ट नगर्न पनि सबैमा अनुरोध गर्दछौँ ।”