इन्स्टाग्रामबाट चोरेर टिकटकले ल्यायो फोटो स्लाइडशो फिचर
असोज २५, २०७९ ८:२
काठमाडौं । आजका दिनसम्म सामाजिक सञ्जालका विभिन्न माध्यमले टिकटकको फिचर कपी गरेको समाचार बाहिर आएको थिए । विशेषगरी इन्स्टाग्राम, फेसबुक र युट्युबले टिकटकको शर्ट भिडिओ शेयरिङ फिचर नै कपी गरेका थिए । अहिले भने टिकटकले इन्स्टाग्रामको एउटा फिचर कपी गरेको छ, जसलाई कम्पनीले 'फोटो मोड' नाम दिएको छ ।
यस नयाँ फिचरमार्फत प्रयोगकर्ताले एउटै पोस्टमा धेरै फोटो शेयर गर्नुका साथै २२०० अक्षरसम्मको क्याप्सन राख्न सक्नेछन् । नयाँ फोटो पोस्टमार्फत म्युजिक पनि फिचर गर्न सकिनेछ । यस्ता पोस्ट प्रयोगकर्ताको 'फर यु पेज'मा भिडिओ सँगसँगै देखिनेछन् ।
टिकटकले एउटा ब्लगपोस्ट सार्वजनिक गर्दै क्याप्सनका शब्दहरू बढाउने बताएको छ । जसका माध्यमबाट क्रियटरले आफूलाई अझ प्रस्ट रूपमा प्रस्तुत गर्नसक्ने टिकटकको विश्वास छ ।
तर, फोटो मोडले 'फर यु पेज'लाई टिकटक जस्तै बनाए पनि त्यो जस्तो क्रियटिभ नहुने विश्लेषक बताउँछन् । माशेबलका अनुसार यो फिचर क्रियटरले मिम तथा अन्य प्रख्यात कन्टेन्ट शेयर गर्नका लागि उपयोग गर्न सक्नेछन् ।
इन्स्टाग्रामले प्रयोगकर्तालाई आकर्षित गर्न आफ्नो प्रमुख फिचरलाई भन्दा रिललाई बढी केन्द्रित गरेको थियो । यस्तो अवस्थामा टिकटकले पनि इन्स्टाग्रामको पदचाप पछ्याएको छ । द वाल स्ट्रिट जर्नलका अनुसार डेली वाच टाइमको आधारमा इन्स्टाग्रामको रिलभन्दा टिकटक धेरै नै अघि छ ।
पछिल्लो समय ठूला ठूला सामाजिक सञ्जालका माध्यमले आफ्ना प्रतिद्वन्दीको फिचर दुरुस्तै कपी गरिरहेका छन् । पछिल्लो छ हप्तामा मात्र इन्स्टाग्राम, टिकटक र स्नापच्याटले फ्रान्सेली स्टार्टअप बिरियलका फिचरहरू कपी गरेका छन् । त्यस्तै ट्वीटरले पनि टिकटकको स्टाइलका फुल स्क्रिन भिडिओ फिचर ल्याएको छ । युट्युब शर्ट्स टिकटकको पूर्ण कपी हो । अहिले यसमा भ्वाइस ओभरको पनि फिचर थपिएको छ ।
पछिल्लो अध्यावधिक: असोज २५, २०७९ ८:३
