close

अव्यवस्थित तार हटाउने काम भोलिदेखि, यी ठाउँमा केही समय इन्टरनेट सेवा अवरुद्ध हुनसक्ने

टेकपाना टेकपाना

कात्तिक २५, २०७९

अव्यवस्थित तार हटाउने काम भोलिदेखि, यी ठाउँमा केही समय इन्टरनेट सेवा अवरुद्ध हुनसक्ने

काठमाडौं । इन्टरनेट सेवा प्रदायकहरूले भोलिदेखि पुनः अव्यवस्थित तार हटाउन थाल्ने भएका छन् । निजी इन्टरनेट सेवा प्रदायकहरूको छाता संगठन इन्टरनेट सेवा प्रदायक संघ (आईस्पान)ले शुक्रबार एक विज्ञप्ति जारी गर्दै सिंहदरबार वरपरका क्षेत्रबाट अव्यवस्थित तार हटाउन लागेको जानकारी दिएको छ ।

यसअन्तर्गत भाेलि पुतलीसडक-माइतीघर क्षेत्रबाट तार व्यवस्थापन गरिने आईस्पानले जनाएको छ । त्यसपछि क्रमैसँग माइतीघर-हनुमानथान, हनुमानथान-भाटभटेनी सुपरमार्केट, हनुमानथान-अनामनगर र अनामनगर-पुतलीसडक क्षेत्रका अव्यवस्थित तार हटाइने आईस्पानले जनाएको छ ।

नेपाल विद्युत प्राधिकरण, नेपाल दूरसञ्चार प्राधिकरण, काठमाडौं महानगरपालिका, काठमाडौं उपत्यका ट्राफिक कार्यालय लगायतका अधिकारीहरूकाे उपस्थितिमा तार व्यवस्थापन गर्न लागेकाे आईस्पानका अध्यक्ष सुधिर पराजुलीले जानकारी दिए । उनका अनुसार तार व्यवस्थापनका क्रममा केही समय इन्टरनेट सेवा अवरुद्ध हुनसक्ने छ ।

''इन्टरनेट सेवा अवरुद्ध नहुनेगरी नै तार व्यवस्थापनकाे काम हुनेछ । समस्या आइहाले आधा घण्टा/एक घण्टामै सेवा सञ्चालनमा ल्याउनेछाैं । इन्टरनेट सेवा प्रदायक र अन्य सम्बन्धित निकाय नै व्यवस्थापन कार्यमा सरिक हुने भएकाले सहज हुने विश्वास लिएका छाैं,'' उनले  टेकपानासँग भने ।

यसअघि आईस्पानले पर्यटकीय क्षेत्र ठमेल, टोखा नगरपालिका, न्युरोड, संकटालगायतका क्षेत्रमा तार व्यवस्थापनकाे काम सम्पन्न गरिसकेकाे छ ।

''ती ठाउँमा इन्टरनेट सेवामा समस्या नआउने गरी वर्षौं पुराना र प्रयोगविहीन तार हटाउन सफल भयौं । अब सिंहदरबार वरपरका क्षेत्रबाट पुनः तार व्यवस्थापन गर्ने प्रयासमा जुटेका छौं,'' आईस्पानका प्रमुख कार्यकारी अधिकृत (सीईओ) सुवास खड्काले भने । 

No description available.