एन्ड्रोइडमा एप क्र्याश हुने समस्या, यसरी गर्नुहोस् समाधान
चैत १०, २०७७ १२:४१
काठमाडौं । सोमबार साँझ विश्वभरका एन्ड्रोइड एप प्रयोगकर्ताहरुले एकाएक एप क्र्यासको सामना गर्नुपर्यो । जीमेल, गुगल, विभिन्न बैंकिङ एप तथा एन्ड्राेइड एपहरु अप्रत्याशित रुपमा बन्द भए ।
मंगलबार गुगलले उक्त एप क्र्यासको घटनालाई स्वीकार गर्दै त्यसको सम्बन्ध वेबभ्यु एपसँग रहेको पुष्टि गरेको छ । बगले वेबभ्यु सिस्टम कम्पोनेन्टलाई प्रयोग गरेर सम्पूर्ण एन्ड्रोइड एपलाई प्रभावित पारेको थियो ।
वेबभ्युमा खराब अपडेट ल्याएको कारण सम्पूर्ण एन्ड्रोइड एपहरु क्र्यास भएको कम्पनीले पुष्टि गरेको छ ।
एन्ड्रोइड सिस्टम वेबभ्यु एउटा सिस्टम एप हो, जसले एपभित्र क्रोमजस्तै रेन्डरिङ प्रदान गर्दछ । डेभलपर तथा इन्ड यूजरका अनुसार याे सिस्टम एपभित्र धेरै एरर देखापरेका थिए ।
यदि प्रयोगकर्ताहरु अझै पनि यो समस्यासँग जुधिरहेका छन् भने एन्ड्रोइड सिस्टम वेबभ्युको लेटेस्ट अपडेटलाई गुगल प्लेस्टोरमा गएर अनइन्स्टल गर्नुपर्छ । त्यसको अपडेटलाई अनइन्स्टल गर्दा यो शान्त भई डिभाइसमा काम गर्न थाल्दछ ।
यसरी गर्नुहाेस् समाधान
- वेबभ्युलाई अनइन्स्टल गर्न सबैभन्दा पहिले गुगल प्लेस्टोरमा जानुहोस् ।
- त्यहाँबाट My apps & games हुँदै Installed मा जानुहोस् ।
- यसो गरेपछि एन्ड्रोइड सिस्टम वेबभ्यु इन्स्टल एप्सको सूचीमा देखा पर्दछ । त्यसलाई ट्याप गरी अनइन्स्टल चयन गर्नुहोस् ।
- अब आफ्नो एन्ड्रोइड डिभाइसलाई रिबुट गरेर हेर्नुहोस् ।
गुगलले यो समस्यालाई पूर्णरुपमा फिक्स नगरेसम्म वेबभ्युको नयाँ भर्सनलाई रिइन्स्टल नगर्नुहोस् । किनभने वेबभ्यु एउटा महत्वपूर्ण तत्व हो, जसले एपलाई वेब पेजमा डिस्प्ले हुन मद्दत गर्दछ ।
पछिल्लो अध्यावधिक: असोज २, २०७९ २२:३१
