कोभिडसँग लडिरहेकाे भारतलाई माइक्रोसफ्ट र गुगलले सहयाेग गर्ने
बैशाख १५, २०७८ १७:५३
काठमाडौं । विश्वका दुई ठूला टेक कम्पनी गुगल र माइक्रोसफ्टले कोभिडसँग लडिरहेको भारतलाई सहयोग गर्ने घोषणा गरेका छन् । कोभिड संक्रमितहरुको संख्या उकालो लागेसँगै भारतीय अस्पतालहरुको अवस्था भयावह बन्दै गइरहेको छ ।
गुगल तथा मातृ कम्पनी अल्फाबेटका प्रमुख सुन्दर पिचाईले भारतको अवस्थाबाट आफू मर्माहित भएको बताउँदै एक करोड ८० लाख डलरको सहयोग रकम प्रदान गर्ने घोषणा गरेका छन् ।
यस्तै माइक्रोसफ्टका प्रमुख सत्य नाडेलाले आफू पनि भारतमा कोरोना दोस्रो लहरबाट उत्पन्न अवस्था देखेर दुःखी भएको बताउँदै त्यहाँ देखापरेको अक्सिजन आपूर्तिको अभावलाई सहयोग गर्न लागि पर्ने बताएका छन् ।
यी दुवै टेक जायन्ट कम्पनीका प्रमुखहरु भारतमा जन्मिएका भारतीय नागरिक हुन् । पिचाई दक्षिण भारतीय शहर चेन्नईमा जन्मिएर विद्यालय तहकाे शिक्षा त्यहीँबाट पुरा गरेका हुन् । उनले गत आइतबार ट्वीटमार्फत सहयोग रकमको घोषणा गरेका हुन् ।
यस्तै नाडेला हैदरावादमा जन्मिएका हुन् । उनी २०१४ मा माइक्रोसफ्टकाे प्रमुखमा नियुक्त भएका हुन् ।
हाल भारतमा कोभिड १९ संक्रमितहरु अक्सिजन अभावका कारण मृत्युवरण गरिरहेका खबर बााहिर आइरहेका छ । भारत सरकारले अक्सिजन आपूर्ति बढाउन देशभर पाँच सयवटा अक्सिजन जेनेरेसन प्लान निर्माण गर्ने योजना लिएको छ ।
पछिल्लो अध्यावधिक: असोज २, २०७९ २२:३१
