अब निःशुल्क प्रयोगकर्ताले ‘ट्वीट डेक’ अर्थात् एक्स प्रो चलाउन नपाउने
भदौ १, २०८० ११:३२
काठमाडौं । हालै एक्समा रिब्रान्ड भएको ट्वीटरकाे ट्वीटडेक (एक्स प्रो) फिचर अब पैसा तिर्ने प्रयोगकर्ताले मात्र प्रयोग गर्न पाउने भएका छ । यसअघि सो फिचर सबै प्रयोगकर्ताले प्रयोग गर्न पाइरहेका थिए । एक्समा रिब्रान्ड भएसँगै कम्पनीले याे फिचरलाई एक्स प्रो नाम दिएकाे थियाे ।
अब सब्स्क्रिप्सन लिएका प्रयाेगकर्ताले मात्रै एक्स प्रो प्रयाेग गर्न पाउनेछन् । विभिन्न प्रयोगकर्ताका अनुसार एक्स प्रो फिचर प्रयोग गर्न खोज्दा अहिले पप-अप देखिन्छ, जसमा प्रयोगकर्तालाई एक्स सब्स्क्रिप्सन लिनुपर्ने उल्लेख गरिएको छ ।
“एक्सले अन्ततः ट्वीटडेट निःशुल्क प्रयोग गर्न नपाउने बनाएको छ,” सामाजिक सञ्जाल विश्लेषक म्याट नभर्राले एक्स पोस्ट राख्दै लेखेका छन्, “यो अब प्रिमियम सब्स्क्राइबरका लागि मात्र उपलब्ध हुने भएको छ । यो सोसल मिडिया मेनेजर, पत्रकार र अन्य प्रयोगकर्ताका लागि दुःखद् समाचार हो ।”
यो अप्रत्याशित रूपमा गरिएको परिवर्तन होइन । यसअघि कम्पनीले जुलाई ३ मा सो फिचर छिट्टै प्रिमियम सब्स्क्राइबरले मात्र प्रयोग गर्न पाउने घोषणा गरेको थियो ।
विशेषगरी कन्टेन्ट क्रियटर, पत्रकार, अनुसन्धानकर्ता, सामाजिक सञ्जाल विश्लेषकले ट्वीटडेक फिचर प्रयोग गर्दै आइरहेका थिए ।
ट्वीटरले सन् २०११ मा चार करोड डलर तिरेर आफ्नो स्वामित्वमा लिएको सो फिचरमार्फत ट्वीटर प्रयोगकर्ताले ट्वीटरका ट्रेन्डबारे जानकारी लिने गर्थे ।
पछिल्लो अध्यावधिक: भदौ १, २०८० ११:३९
