काठमाडौं । एप्पलले भारतमा आईफोन १५ को उत्पादन सुरु गरेको छ । एप्पलको आपूर्तिकर्ता फक्सकनले भारतको तामिलनाडुस्थित आफ्नो प्लान्टमा आईफोनकाे नयाँ सिरिज उत्पादन थालेको हो ।
चीनमा आईफोन उत्पादन भएको केही दिन भित्रमै फक्सकनले भारतमा काम थालेको हाे । अमेरिका-चीनबीच बढ्दाे तिक्तताका बीच एप्पलले चीनमाथिको उत्पादन निर्भरता घटाउन भारतीय प्लान्टलाई प्राथमिकता दिने गरेकाे छ ।
एप्पलका सीईओ टिम कुक स्वयंले भारतलाई ‘ठूलो अवसर’ भएको बताएका थिए । उनको उक्त भनाइले पनि भारतलाई आफ्नो उत्पादन केन्द्र र बजार बनाउन एप्पल लागेको अनुमान गर्न सकिन्छ ।
पछिल्लो समय एप्पलले भारतमा आफ्नो आईफोन उत्पादनको मात्रा बढाउँदै लगेको छ । सन् २०२२ मा मात्रै भारतमा सात अर्ब डलर बढी मूल्यको आईफोन एसेम्बल भएको थियो ।
भारतमा फक्सकन बाहेक पेगाट्रोन, टाटा ग्रुप जस्ता अन्य कम्पनीले पनि आईफोन १५ एसेम्बल गर्न लागेकाे बताइएकाे छ ।
आउँदो सेप्टेम्बर महिनामा हुने 'एप्पल इभेन्ट'मा आईफोन १५ सार्वजनिक हुँदैछ ।