महिलाको चरित्रहत्या गरेको आरोपमा युट्युबर मनोज मानव पक्राउ

काठमाडौं । मनोज मानव भनेर चिनिने युट्युबर मनोज कुमार महतो (मनोज मानव) पक्राउ परेका छन् । साइबर ब्यूरोबाट खटिएको प्रहरी टोलीले बुधवार राति पौने ८ बजे कीर्तिपुरबाट महतोलाई पक्राउ गरेको हो । 

साइबर ब्यूरोका प्रवक्ता एवम् प्रहरी उपरीक्षक पशुपतिप्रसाद रायका अनुसार महतोमाथि सामाजिक सञ्जाल तथा युट्युबमा आफ्नो चरित्रहत्या गरी भिडिओ राखेको भन्दै एक महिलाले उजुरी दिएकी थिइन् ।

उजुरीपछि अनुसन्धान गर्दै जाँदा महतो पक्राउ परेका हुन् । “सामाजिक सञ्जालमा महिलाको चरित्रहत्या हुनेगरी भिडिओ राखेको भन्ने आरोप छ,” रायले टेकपानासँग भने, “उजुरी परेपछि हामीले पक्राउ गरेका अनुसन्धानका लागि कार्यालयमा ल्याएका छौं ।”

प्रहरी उपरीक्षक रायका अनुसार अहिले उनीमाथि प्रारम्भिक चरणको अनुसन्धान भइरहेको छ । विस्तृत जानकारी बिहीवार साँझसम्म बाहिर आउने रायले बताए । 

 

पछिल्लो अध्यावधिक: कात्तिक २३, २०८० १२:१९

टिप्पणीहरू